Islamnyń irgetasy – júrektegi iman. Ibn Omardan (Alla oǵan razy bolsyn) jetken sahih hadiste Paiǵambarymyz (oǵan Allanyń salaýaty men sálemi bolsyn): «Islam bes nárse ústine qurylǵan. Olar – „Lá iláha illállahý ýá ánná Mýhammadán rasýlýllahi“ sózi, namaz oqý, zeket berý, qajylyqqa barý, Ramazan aiynda oraza ustaý», – degen (Buhari, Múslim).
Bul bes paryz árbir musylmannyń Alla Taǵalaǵa degen shynaiy senimin bekitip, pendeni rýhani turǵyda kemeldenýge bastaidy. Al barlyq qulshylyqtyń qabyl bolýy, eń aldymen, sol shynaiy imanǵa bailanysty ekeni daýsyz.
Musylman adamnyń árbir ǵibadatyna saýap berilýi úshin ol aldymen Muhammed paiǵambardyń (oǵan Allanyń salaýaty men sálemi bolsyn) Alla tarapynan jetkizgen aqiqattaryn júrekpen qabyldap, sodan soń namaz oqyp, oraza ustap, zeket berip, qolynan kelse, qasietti Qaǵbany ziiarat etip, basqa da izgi isterdi oryndaýy tiis.
Iman men amaldyń ushtasýy – pendeniń Jaratýshy aldyndaǵy jaýapkershiligin tolyq sezingenin kórsetedi. «Zálzálá» súresiniń 7-8-aiattarynda: «Endeshe, kimde-kim záredei jaqsylyq jasasa, sonyń qarymyn alady. Kimde-kim záredei jamandyq jasasa, sonyń jazasyn tartady», – dep baiandalǵan. Bul aqiqat adam balasynyń qai isi bolmasyn marapatsyz nemese jazasyz qalmaitynyn bildiredi.
Alla Taǵalanyń sheksiz ádileti jaily «Ánbiia» súresiniń 47-aiatynda da keńinen sóz qozǵalǵan: «Qiiamet kúni sol kúnge tán dál tartatyn ádilet tarazylaryn quramyz da, adamdardyń dúniedegi isterin túgeldei tartamyz. Ol kúni eshbir janǵa tittei de ádiletsizdik jasalmaidy. Istelgen is qyshanyń dánegindei mysqaldai bolsa-daǵy ony tarazyǵa tartamyz. Biz jaýapqa tartýshylar retinde jetkiliktimiz».
Kúnine bes ýaqyt namaz oqý men Ramazan aiynda oraza ustaý – Islam dininde árqaisysy jeke-jeke paryz etilgen ǵibadattar. Onyń birin oryndamaý ekinshisin joqqa shyǵarmaidy.
Máselen, namaz oqymaityn kisi oraza ustaýy arqyly áiteýir bir saýabyn alýy múmkin. Alaida namazdyń qadir-qasieti óte joǵary ekeni de belgili. Namaz oqý – baliǵat jasyna jetken, aqyl iesine paryz. Qiiamet kúni eń áýeli suralatyn amal da – osy namaz. Paiǵambarymyz (oǵan Allanyń salaýaty men sálemi bolsyn): «Qiiamet kúni eń aldymen pende namaz jaiynda suralady. Eger namazy durys bolsa, qutylady ári utady. Eger namazy bolmasa, aldanady ári ziianǵa ushyraidy» (Termizi, Ábý Dáýit, Násai) degen. Demek, aqyrettegi esep-qisaptyń ózegi – pendeniń Rabbysyna qalai qulshylyq qylǵanynda.
Bul dúniede ár adamnyń aldynda Alla Taǵala buiyrǵan paryzdardy yqylaspen oryndaý múmkindigi bar. Musylmannyń boiyndaǵy berik senim – onyń ǵibadattaryn jandandyryp, saýap esikterin ashady.
Barlyq paryz ben súnnet amaldardy oryndaýǵa tyrysý – árbirimizdiń mindetimiz, ári júregimizde tiri turǵan imanymyzdyń nyshany.
Alla Taǵala bárimizge namazdyń bereketin sezinýdi, orazanyń sabyryn boiymyzǵa darytýdy, zekettiń meiirimin uqtyrýdy, qajylyqtyń rýhani jańǵyrýyn kórýdi násip etkei. Imanymyz kámil bolsa, ǵibadatymyz da qabyl bolmaq. Al jaqsylyq ataýlynyń qaitarymy – Allanyń qiiamettegi ólsheýsiz syiy.
