N. Nazarbaev: "EKSPO kórmesi oidaǵydai ótti"
Nursultan Nazarbaev kórmeniń Qazaqstan ekonomikasyn damytýǵa mýltiplikativtik turǵydan oń áser etkenin erekshe atap ótti.
– Shaǵyn jáne orta biznestegi 1400-den astam kásiporyn quny 640 milliard teńge bolatyn taýarlardy jetkizýge jáne qyzmet kórsetýge tapsyrys aldy. Týristik sektor jandana tústi. Týroperatorlardyń qyzmetine degen suranys 1,8 ese artty. Astanada kásipkerlik sýbektileriniń sany 10 paiyzdan asa kóbeidi. Elorda biýdjetine qyzmet kórsetý salasynan túsken salyq 1,2 ese ósti. Qazaqstannyń astanasy búkil álemniń nazaryn ózine aýdardy, – dedi Elbasy.
Memleket basshysy kórme aiasynda ótken mádeni jáne halyqaralyq sharalarǵa toqtaldy.
– Kún saiyn elordamyz tórtkúl dúnieniń túkpir-túkpirinen jetken túrli mádeniettiń áýeni men naqyshyna bólenip turdy. Búgingi saltanatty rásim Islam yntymaqtastyǵy uiymynyń ǵylym jáne tehnologiialar jónindegi sammitimen tuspa-tus kelip otyr. Onda islam álemindegi ǵylymi-tehnikalyq damýdyń mańyzdy máseleleri talqylanýda. Jalpy, EKSPO aiasynda 6 myńnan astam túrli is-shara ótkizildi, – dedi Nursultan Nazarbaev.
Qazaqstan Prezidenti elimizdiń Eýraziia óńirindegi qaýipsiz ári qarqyndy damyp kele jatqan memleket retindegi oń imidjin nyǵaita túskenin atap ótti.
Memleket basshysy «Bolashaqtyń energiiasy» aiasynda ozyq ideialar men tehnologiialardyń damýyna túrtki bolǵan jáne álemde ǵylymnyń ózara yqpaldastyǵyn nyǵaitýǵa septigin tigizgen kórmeniń birqatar jaǵymdy aspektilerine toqtaldy.
– EKSPO búkil álemniń intellektýaldyq jáne tehnologiialyq áleýetin kórsetýge zor múmkindik berdi. Munda jańartylatyn energiia kózderi salasyndaǵy 140-qa jýyq ǵylymi jańalyq kópshilik nazaryna usynyldy, – dedi Nursultan Nazarbaev.
Sonymen qatar, Qazaqstan Prezidenti EKSPO aiasynda qazirgi zamanǵy energetikalyq saiasattyń basymdyqtary jóninde jahandyq dialog uiymdastyrylǵanyn jáne energetika men ekologiia salasyndaǵy zamanaýi problemalardy sheshýge arnalǵan usynymdar ázirlengenin atap ótti.
– EKSPO kórmesin ótkizý arqyly bizdiń el «jasyl» tehnologiialardy damytý ideiasyna berik ekenin taǵy da dáleldei tústi. Jalpy, bizdiń kórme «taza energetikany» jahandyq deńgeide damytýǵa airyqsha úles qosatynyna senimdimin, – dedi Memleket basshysy.
Sonymen birge, Nursultan Nazarbaev EKSPO infraqurylymyn kórmeden keiin paidalaný jospary jóninde oi bólisti.
– «Nur Álem» jáne kórme taqyryby kórinis tapqan basqa da birqatar pavilondar «EKSPO murasy» retinde saqtalady. Kórmeniń aiaqtalýy birneshe aýqymdy jańa jobalardy bastaýǵa múmkindik beredi. Eń aldymen, munda «Astana» halyqaralyq qarjy ortalyǵy ornalasady. Ol qarjy habyna, investitsiia tartatyn ortalyqqa ainalyp, halyqaralyq qarjy júiesinde laiyqty orynǵa ie bolýǵa tiis, – dedi Qazaqstan Prezidenti.
Sondai-aq, Memleket basshysy «jasyl» tehnologiialar men investitsiialardy damytý jónindegi halyqaralyq ortalyqty jáne IT-startaptar halyqaralyq tehnoparkin qurýǵa arnalǵan jobalarǵa toqtaldy.
– «EKSPO» kórme kesheni tolyǵymen innovatsiialyq jáne ornyqty damýdyń maqsattaryna odan ári qyzmet etetin bolady. Barshańyzdy jańa ortalyqtardyń jumysyna belsendi atsalysýǵa shaqyramyn, – dedi Nursultan Nazarbaev.
Sońynda Qazaqstan Prezidenti kórmeni ótkizýge úles qosqandardyń bárine alǵys aityp, kelgen qonaqtarǵa erekshe rizashylyǵyn bildirdi.
– Osymen halyqaralyq «EKSPO-2017» mamandandyrylǵan kórmesin jabyq dep jariialaimyn! Onyń ideiasynyń tolyǵymen júzege asýyna qoldaý kórsetken Qazaqstan halqyna rizashylyǵymdy bildiremin. Kórmeniń sátti ótýine myńdaǵan adam atsalysyp, eńbek etti. Barshańyzǵa Qazaq jerindegi aitýly sharaǵa belsene qatysqandaryńyz úshin alǵys aitamyn, – dedi Memleket basshysy.
