– Ózderińiz bilesiz, 2020 jyly «Beıbit jınalystar týraly» jańa Zań kúshine endi. Mıtıń uıymdastyrý prosesi «ruqsat berý» júıesinen «habarlama» qaǵıdatyna kóshti. Osyǵan oraı, polısıanyń qoǵamdyq tártipti qamtamasyz etý ádisteri ózgerdi. Polısıa qyzmetkerleri mıtıń ótetin aýmaqqa jaqyn jerde ornalasady. Qarý men arnaıy quraldardy qoldanbaıdy. Jınalǵandarmen tikeleı qarym-qatynasty tek ákimdik ókilderi ǵana júzege asyrady, –dedi mınıstr.
Onyń atap ótýinshe, polısıa mıtıńti toqtatý úshin azamattardyń ómiri men densaýlyǵyna, qoǵamdyq tártipke qaýip tóngen, múlikke zalal keltirý, áleýmettik, násildik, dinı alaýyzdyqty qozdyrý; konstıtýsıalyq qurylysty, aımaqtyq tutastyqty kúshpen qulatýǵa shaqyrý faktileri oryn alǵan jaǵdaılarda ǵana tartylady.
– Jańa Zań kúshine engennen bastap, polısıa men narazylyq bildirýshilerdiń arasynda eshqandaı qaqtyǵys bolmaǵan. Týra osy algorıtm «Qańtar oqıǵalarynyń» alǵashqy kúnderinde de qoldanyldy, – dedi Marat Ahmetjanov.
