– وزدەرىڭىز بىلەسىز، 2020 جىلى «بەيبىت جينالىستار تۋرالى» جاڭا زاڭ كۇشىنە ەندى. ميتينگ ۇيىمداستىرۋ پروسەسى «رۇقسات بەرۋ» جۇيەسىنەن «حابارلاما» قاعيداتىنا كوشتى. وسىعان وراي، پوليسيانىڭ قوعامدىق ءتارتىپتى قامتاماسىز ەتۋ ادىستەرى وزگەردى. پوليسيا قىزمەتكەرلەرى ميتينگ وتەتىن اۋماققا جاقىن جەردە ورنالاسادى. قارۋ مەن ارنايى قۇرالداردى قولدانبايدى. جينالعاندارمەن تىكەلەي قارىم-قاتىناستى تەك اكىمدىك وكىلدەرى عانا جۇزەگە اسىرادى، –دەدى مينيستر.
ونىڭ اتاپ وتۋىنشە، پوليسيا ميتينگتى توقتاتۋ ءۇشىن ازاماتتاردىڭ ءومىرى مەن دەنساۋلىعىنا، قوعامدىق تارتىپكە ءقاۋىپ تونگەن، مۇلىككە زالال كەلتىرۋ، الەۋمەتتىك، ناسىلدىك، ءدىني الاۋىزدىقتى قوزدىرۋ؛ كونستيتۋسيالىق قۇرىلىستى، ايماقتىق تۇتاستىقتى كۇشپەن قۇلاتۋعا شاقىرۋ فاكتىلەرى ورىن العان جاعدايلاردا عانا تارتىلادى.
– جاڭا زاڭ كۇشىنە ەنگەننەن باستاپ، پوليسيا مەن نارازىلىق بىلدىرۋشىلەردىڭ اراسىندا ەشقانداي قاقتىعىس بولماعان. تۋرا وسى الگوريتم «قاڭتار وقيعالارىنىڭ» العاشقى كۇندەرىندە دە قولدانىلدى، – دەدى مارات احمەتجانوۆ.
