Áleýmettik jelide muǵalim oqýshylarǵa jónsiz qylyq kórsetip, balaǵat sózder aitqany túsirilgen video tarady, – dep habarlaidy Dalanews.kz Stan.kz-ke siltep.
Áleýmettik jelide taraǵan aqparatqa sáikes, oqiǵa Almaty oblysy Shonjy aýylyndaǵy mektepterdiń birinde bolǵan. Internette taraǵan videoda muǵalimniń oqýshyny iterip, uialy telefonǵa túsirip turǵanyn baiqaýǵa bolady.
Sondai-aq, muǵalim balalardy "aqymaq, misyz" dep ataidy.
Ata-analar oblystyq bilim basqarmasynan jan-jaqty tekseris júrgizýdi talap etti.
Bul oqiǵa áleýmettik jelilerde qyzý talqyǵa tústi. Jeli qoldanýshylardyń pikiri ekige bólindi.
“Mundai áreket muǵalimge jaraspaidy”, “Balalarmen jumys isteý kezinde etikalyq normalardy qatań saqtaý qajet”, “Kerisinshe qazirgi zaman balalary ózin-ózi ustai almaidy. Tipti muǵalimderge oqýshylarmen jumys isteý qiynǵa soǵyp barady”, – dep jazdy jeli qoldanýshylary.
Almaty oblysy bilim basqarmasy málimetinshe, muǵalim 36 jyl boiy ustazdyq etken.
"Uiǵyr aýdandyq bilim bólimi dene shynyqtyrý pániniń muǵalimi Iskanderova Elmira №1 Shonjy mektep-litseiinde jumys isteitinin málimdeidi. Jalpy pedagogikalyq ótili - 36 jyl. Moderator sanatyna ie. Jelide taraǵan videoǵa qatysty qyzmettik tekseris júrgizildi. Video úzilis kezinde túsirilgen. Onda muǵalim balalardy iterip, qorlaidy. Bul oqiǵa boiynsha tergeý júrgizildi. Muǵalimge pedagogikalyq ádepti buzǵany úshin qatań sógis jariialandy", – delingen habarlamada.
Basqarmanyń habarlaýynsha, videoda kórsetilgen oqýshylarǵa endi basqa muǵalim sabaq beredi.
"Videodaǵy 7 "E" synybynyń saǵattary basqa dene shynyqtyrý páni muǵalimine berildi. Mektep ákimshiligi jaǵdaidy baqylaýda ustaidy. Aýdandyq bilim bólimi bul derekti tekserý úshin arnaiy komissiia qurdy. Osy oqiǵaǵa bailanysty aýdandyq bilim bólimi bul máseleni Pedagogikalyq ádep jónindegi keńeste qaraý úshin Almaty oblysynyń bilim basqarmasyna habarlasty", – delingen habarlamada.
