Jýrnalister málimetine qaraǵanda, Mirziiaevtiń záýlim úii jáne tikushaq qonatyn alańqaiy bar nysan qurylysy 2017 jyly bastalyp, 2018 jyl aiaǵyna taman bitken. Keshen Ýgam-Chatkal biosfera qoryǵy aýmaǵynda boi kótergen. Bul qoryqtyń bir bóligi UNESCO uiymynyń dúniejúzilik muralary tizimine engen.
Zertteýde shipajai mańynda jańa sý qoimasy bar ekeni aitylǵan. Jergilikti turǵyndardyń aitýynsha, bul qoima sýmen qamtý júiesine kedergi keltirgen. Sol sebepti birneshe otbasy kóshýge májbúr bolǵan.
Azattyq radiosynyń málimeti boiynsha, qurylysty «Ózbekstan temir joldary» memlekettik kompaniiasy júrgizgen. Sý qoimasyn byltyr jarylǵan Sardoba qoimasyn turǵyzǵan kompaniia salǵan. Sardobadaǵy apattan alty adam qaza taýyp, myńdaǵan adam baspanasyz qalǵan edi.
Qupiia shipajai Tashkentten ońtústik-shyǵysqa qarai 100 shaqyrym jerde ornalasqan. Bul jer Ózbekstanda ushýǵa tyiym salynǵan alty aimaqtyń birine jatady. Mirziiaev ákimshiligi men «Ózbekstan temir joly» baspasóz qyzmeti jýrnalister saýaldaryna ázirge jaýap bergen joq.
