وزبەكستاننىڭ مەملەكەتتىك كومپانيالارى پرەزيدەنت شاۆكات ميرزيايەۆتىڭ تاۋداعى قۇپيا شيپاجايىنىڭ قۇرىلىسىن جۇرگىزگەن. ازاتتىق راديوسىنىڭ وزبەك قىزمەتى جۋرناليستىك زەرتتەۋىنىڭ اۆتورلارى وسىنداي تۇجىرىم جاساعان.

جۋرناليستەر مالىمەتىنە قاراعاندا، ميرزيايەۆتىڭ ءزاۋلىم ءۇيى جانە تىكۇشاق قوناتىن الاڭقايى بار نىسان قۇرىلىسى 2017 جىلى باستالىپ، 2018 جىل اياعىنا تامان بىتكەن. كەشەن ۋگام-چاتكال بيوسفەرا قورىعى اۋماعىندا بوي كوتەرگەن. بۇل قورىقتىڭ ءبىر بولىگى UNESCO ۇيىمىنىڭ دۇنيەجۇزىلىك مۇرالارى تىزىمىنە ەنگەن.

زەرتتەۋدە شيپاجاي ماڭىندا جاڭا سۋ قويماسى بار ەكەنى ايتىلعان. جەرگىلىكتى تۇرعىنداردىڭ ايتۋىنشا، بۇل قويما سۋمەن قامتۋ جۇيەسىنە كەدەرگى كەلتىرگەن. سول سەبەپتى بىرنەشە وتباسى كوشۋگە ءماجبۇر بولعان.

ازاتتىق راديوسىنىڭ مالىمەتى بويىنشا، قۇرىلىستى «وزبەكستان تەمىر جولدارى» مەملەكەتتىك كومپانياسى جۇرگىزگەن. سۋ قويماسىن بىلتىر جارىلعان ساردوبا قويماسىن تۇرعىزعان كومپانيا سالعان. ساردوباداعى اپاتتان التى ادام قازا تاۋىپ، مىڭداعان ادام باسپاناسىز قالعان ەدى.

قۇپيا شيپاجاي تاشكەنتتەن وڭتۇستىك-شىعىسقا قاراي 100 شاقىرىم جەردە ورنالاسقان. بۇل جەر وزبەكستاندا ۇشۋعا تىيىم سالىنعان التى ايماقتىڭ بىرىنە جاتادى. ميرزيايەۆ اكىمشىلىگى مەن «وزبەكستان تەمىر جولى» باسپا ءسوز قىزمەتى جۋرناليستەر ساۋالدارىنا ازىرگە جاۋاپ بەرگەن جوق.