Ekinshi ret prezıdent saılaýyna túsip jatqan Ózbekstan prezıdenti Shavkat Mırzıaev 19 qazanda Tashkenttiń Almazar aýdanyndaǵy stýdentter qalashyǵynda saılaýshylarmen kezdesip, bas qaladaǵy qıyn kúnderin aıtyp berdi, – dep habarlaıdy Dalanews.kz.

Memleket basshysynyń sózinshe, ol Jyzaq oblysynda týylǵanyna qaramastan, 18 jasynan beri Tashkentte turyp, oqyp, tárbıe alǵan.

– Páterde turyp, qıyn kúnderdi bastan ótkerdim. Sondyqtan páter máselesine óte salmaqty qaraımyn. Men tirkeýsiz (propıskasyz) 18 jyl turǵam. Bul máseleni sheshýge bolady eken! – dedi Mırzıaev.

Ótken aptada Ózbekstan parlamentinde «turatyn jerinde tirkelý» degen túsinik «moraldyq jaǵynan eskirgeni» aıtylǵan zań jobasy talqylanǵan.

Byltyr Shavkat Mırzıaev Tashkent qalasy jáne oblysynda tirkelý júıesin retke keltirý jóninde buıryqqa qol qoıǵan. Qujatta astanada tirkelý úshin qoıylǵan birqatar talaptar alynyp tastalǵan.

Prezıdent saılaýshylarmen kezdesý kezinde repressıa máselesine de toqtaldy.

– Eger bizdiń 100 000 ǵalymymyz repressıaǵa ushyramaǵanda, búgin biz Tórtinshi renesans týraly áńgime aıtyp jatar edik. Sebebi olar uly ózbek halqynyń óte myqty ekenin bilgen... Biz tarıhymyzdy qaıta qalpyna keltirý úshin biraz jumys istedik. Biraq bul tek alǵashqy qadamdar, – dedi Mırzıaev.

Ózbekstanda prezıdent saılaýy 24 qazanda ótedi.