Jangeldin aýylynda tórt adamnan turatyn otbasynyń ólimine qatysty sot otyrysynda aiyptalýshy Sultan Sársemálievtiń ata-anasy kýá retinde jaýap berdi, dep dalanews.kz tilshisi "Aq Jaiyq" basylymyna silteme jasap habarlaidy.
Atyraý oblysynyń qylmystyq ister jónindegi mamandandyrylǵan aýdanaralyq sotynda atyshýly is boiynsha kýágerlerden jaýap alý bastaldy. Is materialdaryna sáikes, sotta barlyǵy 26 kýágerdiń jaýaby tyńdalmaq. Onyń 17-sinen túski úziliske deiin jaýap alý josparlanǵan.
Sot zalyna alǵash bolyp aiyptalýshynyń ákesi Samiǵolla Sársemáliev shaqyryldy. Er adam zalǵa aqsańdap kirgendikten, sýdia oǵan otyryp jaýap berýge ruqsat berdi.
Ákesinen jaýap alý bastalǵan sátte Sultan Sársemáliev emotsiiasyn jasyra almai, kóz jasyna erik berdi. Sýdia onyń jaǵdaiyn suraǵanda, advokaty qysqasha ǵana "tolqyp otyr" dep jaýap berdi.
Sottyń suraqtaryna jaýap bergen ákesi ulyn sabyrly, otbasyna jaqyn adam retinde sipattady. Onyń aitýynsha, Sultan temeki shekpegen, nasybai atpaǵan, qumar oiynǵa áýes bolmaǵan jáne janjaldan aýlaq júrýge tyrysqan.
"Ol otbasyn oilaityn. Jaýapty adam boldy", – dedi kýá.
Sonymen qatar Samiǵolla Sársemáliev ulyn tolyq aqtaýǵa tyryspaitynyn aitty.
"Sot kimniń kináli ekenin anyqtap, bul iske núkte qoiady dep úmittenemin", – dedi ol.
Kýá bolǵan jaǵdaidy áli kúnge deiin tolyq túsine almai júrgenin jetkizdi. Onyń sózinshe, ulynyń mundai aýyr qylmysqa barýy múmkin ekenine sený qiyn.
Aiyptalýshynyń ákesi nemerelerin jii kórip turatynyn da aitty. Onyń sózinshe, balalardyń biri qazir sábiler úiinde, al taǵy tórteýi Kámeletke tolmaǵandardy beiimdeý ortalyǵynda.
Jaýap alý barysynda ol Sultan men burynǵy áieli Aqbaiannyń arasyna ózge adamdar aralasqan bolýy múmkin degen oiyn aitty. Osy kezde sýdia mundai jaǵdai adam óltirýge sebep bola ala ma dep naqtylady.
"Olai eshkim oilamaidy jáne eshkim bulai aitpaidy", – dedi kýá.
Ol qazirgi kezde jas otbasylardyń ata-anadan bólek turýdy jii tańdaitynyn, munyń qoǵamda qalypty jaǵdaiǵa ainalǵanyn da atap ótti.
Samiǵolla Sársemáliev ulynyń bala kezinde psihologiialyq jaraqat nemese aýyr kúizelis almaǵanyn aitty. Sondai-aq ol Sultan men Aqbaian Muqanǵalievanyń arasynda kózge kórinetin úlken janjaldardy baiqamaǵanyn jetkizdi.
"Men onyń Aqbaianǵa qol kótergenin nemese dóreki sóilegenin eshqashan kórgen emespin", – dedi aiyptalýshynyń ákesi.
Sýdia buryn tatý turǵan erli-zaiyptylardyń arasynda keiin ne bolýy múmkin ekenin suraǵanda, kýá muny turmystyq kelispeýshilik bolýy yqtimal dep túsindirdi.
"Qazaqta erli-zaiyptynyń arasyna bóten adam túspeidi deidi", – dedi ol.
Aiyptalýshynyń ákesi 2025 jyldyń qarasha jáne jeltoqsan ailaryndaǵy oqiǵalardan habarsyz bolǵanyn aitty. Marqumdardyń týystary Muqanǵalievter otbasymen bailanysa almai júrgenin, úilerinen eshkimdi tappaǵanyn jetkizgende de, ol birden jamandyq boldy dep oilamaǵan. Burynǵy qudalary basqa jaqqa ketken shyǵar dep topshylaǵan.
Keiin oǵan Sultan men Aqbaian Ózbekstanda júr degen aqparat jetken. Shyn máninde ne bolǵanyn biraz ýaqyt ótken soń ǵana bilgenin aitty.
Kýániń sózinshe, ol Maqsotty sońǵy ret qyzyn alyp ketýge kelgen kúni kórgen. Sol kezde ol jastardy bólek turmaýǵa kóndirmek bolǵan, alaida onyń keńesine qulaq aspaǵan.
Budan keiin sotta aiyptalýshynyń anasy Gúlnar Azmuhanova kýá retinde shaqyryldy. Ol sot suraqtaryna jaýap berýden bas tartty. Osyǵan bailanysty sýdia onyń tergeý kezinde bergen jaýabyn oqyp berdi. Áiel bul jaýaptaryn tolyq rastady.
Sot zalynan shyǵar aldynda Gúlnar Azmuhanova ulyna sóz aitýǵa ruqsat surady. Ol Sultanǵa bes balasy bar ekenin jáne qandai jaǵdai bolsa da, olar úshin áke bolyp qala beretinin aitty.
"Sen bul ómirdiń qýanyshyn kórmediń. Ómir boiy kúresip keldiń. Myqty bol. Ómir úshin kúres. Men balalaryńa olardyń ákesi bar ekenin aityp otyramyn", – dedi anasy.
