Úkimet basshysynyń birinshi orynbasary ámbe Qarjy ministri Álihan Smaiylov buǵan qatysty pikir bildirdi, dep habarlaidy Dalanews.kz.
- Bilesizder ótkende zańnamaǵa ózgeris engizdik. Aldaǵy 10 jylda áielderdiń zeinetke shyǵý jasyn jyl saiyn 6 aiǵa kóterip, ony 58-den 63 jasqa deiin uzartýdy kózdep otyrmyz. Búginderi osy talaptar júzege asýda, - dedi Qarjy ministri.
"Bul túzetýler qaita qaralýy múmkin be?" degen saýalǵa Smaiylov:
"Ulttyq keńes? Iá, usynysty estidik, nazarǵa alamyz. Alaida kúlli álemde ázir kerisinshe bolyp jatyr ǵoi. Álemdik tájiribede áielder 65-67 jastyń shamasynda zeinetke shyǵady. Nege deseńizder jahan jurtynyń ómir súrý deńgeii jaqsaryp, ómir súrý jasy jyldan jylǵa uzaryp keledi", - dep jaýap berdi.
Al Ulttyq qoǵamdyq senim keńesindegi ózge de usynystardy ázirgi kúni Qarjy ministrliginiń mamandary qarastyryp, jaýap ázirlep jatyr eken.
- Onyń ishinde zeinet jasyna qatysty usynys ta bar. Degenmen mynany túsinińizder, barsha álemdegidei bizdiń elde de ómir súrý uzaqtyǵy jyldan jylǵa artýda. Tiisinshe jasy 65 -ten asqan adamdardyń sany kóbeiýde. Biz 65 jastan asqan adamdar halyqtyń 7% -nen asqanda 70 jyl degen mejeni eńserip qoiǵanbyz. Bul bizdiń emes, BUU standarttary boiynsha qartaiýshy halyqqa jatqyzylady. Osynyń bárin esepke alý qajet, - dedi ol.
Smaiylovtyń aitýynsha, Qazaqstanda jyl saiyn qarttardyń sany artyp keledi.
"Eger biz zeinetaqy júiesi turaqty jáne zeinetkerlerdiń laiyqty ómir súrýin qamsyzdandyra alsyn desek, onda biz búkil júieniń turaqtylyǵy turǵysynan bul máseleni qarastyrýymyz kerek. Qansha eńbekke jaramdy jastaǵy azamattar jumys isteidi, zeinetaqy júiesiniń esebinen qansha azamatty qamtamasyz etýimiz kerek. Osyndai taldaýlar men zertteýler nátijesi aldynda biz qabyldaǵan zańnamadaǵy ózgeristerge negiz bolǵan", - dep sózin qorytyndylady Qarjy ministri.
