Kólik ministri Marat Qarabaev "Qazaqstan Respýblikasynyń keibir zańnamalyq aktilerine jolaýshylardy avtomobilmen tasymaldaý salasyndaǵy keibir memlekettik fýnktsiialardy mindetti múshelikke (qatysýǵa) negizdelgen ózin-ózi retteýge berý máseleleri boiynsha ózgerister men tolyqtyrýlar engizý týraly" zań jobasy jóninde baiandama jasady.
Depýtat Rinat Zaiytov baiandama jasaǵan ministrge tótesinen suraq qoidy, - dep habarlaidy Dalanews.kz.
Depýtat Zaiytov ministrge birqatar saýal joldap, taksister dúrlikse, másele qalai retteletinin surady.
"Úkimettiń músheleriniń bastamashylyǵymen Májiliske kelgeli birde-bir zańnyń halyqqa paidasy tiip, jumys istep jatqanyn kórgen joqpyn. Bálkim, kórmei júrgen shyǵarmyn, ony betime kelip aityńyzdar. Qurmetti Marat Kárimjanuly, bizde kásipkerlerdiń múddesin qorǵaidy degen bir emes, eki palata bar. Jol tasymaly degen kishi kásipkerlik qoi. Nege solar basqara salmaidy?! Áiteýir bárine bir-bir qojaiyn taýyp beremiz. Sondyqtan sizge suraq: osynshama taksisterdi endi otarlaýdyń qajeti qansha?! Ekinshi suraǵym: bular ózi - shýly qaýym, erteń dúrligetin bolsa, taksimen jii júretin adam bolǵannan keiin kim kóringennen jaman sóz estigimiz kelmeidi. Dúrligetin bolsa, jaýapkershilikti ózińiz moinyńyzǵa alasyz ba?" - dedi Zaiytov.
Ministr bul máselede birinshi kezekte ózine jaýapkershilik alatynyn jetkizdi.
"Memlekettik organnyń birinshi basshysy retinde jaýapkershilikti moinyma alamyn. Birinshi suraǵyńyz boiynsha, taksidi biz de birneshe ret jinadyq. Ministrlikte de, jeke de jinadyq. Shyny kerek, alpaýyt internet agregattardyń qasynda olardyń quqyǵyn qorǵaityn eshkim qalmady. Sondyqtan ekeýi bir ózin-ózi retteitin uiymǵa múshe bolǵan soń, olardyń qabyldaǵan qaǵidasynda eń aldymen bizdiń qarapaiym júrgizýshiler ózderiniń quqyqtaryn qorǵaityn talaptardy qoia alady jáne sony talap ete alady. Sondyqtan ózin-ózi basqarý - retteý uiymy Qazaqstannyń qarapaiym júrgizýshileriniń múddesin qorǵaýǵa baǵyttalǵan", - dep jaýap berdi ministr.
