Muhtar Taijan: «Jer komissiiasynyń qai múshesi qalai daýys bergenin el bilýi kerek»
Atyraý qalasynda ótip jatqan Jer reformasy jónindegi komissiia otyrysynda saiasatker, komissiianyń quqyqtyq jumys tobynyń jetekshisi Muhtar Taijan osyndai usynys tastady, - dep habarlaidy Qamshy.kz.
«Komissiia jumysy eldiń nazarynda. Aqyrǵy sheshim qalai qabyldanatynyna bári alańdaýly. Sondyqtan, jerdi satý, jalǵa berý máselelerinde kim qalai daýys berdi degen aqparattar ashyq bolýy kerek», - deidi Muhtar Taijan.
Komissiia otyrysynda saiasatker tómendegi máselelerge nazar aýdartty.
«Jaiylym jer jetispei jatyr. Ár aýyldyń aimaǵynda naqty radiýs ishinde jaiylym jer eshkimge jalǵa berilmeý kerek.
Ekinshi úlken másele – qazaqstandyqtarǵa jerdi jalǵa berý. Keibireýler biledi, bireýler bilmeidi, sońǵy zańnama boiynsha jerdi jalǵa alý múmkindigi alynyp tastaldy. Biz sol múmkindikti qaldyrýdy usynamyz. Kelesi qadam, latifýndizmge qarsy sharalar. Bir adamǵa beriletin jerdiń kólemine shekteý ornatylady. Amandyq bolsa, osy usynystar parlamentke beriledi.
Sonymen qatar, komissiiadaǵy usynystar ishinde kelispeitin jerler de bar. Máselen, kadastr máselesi. Ol degen ashyq málimet. Qazir jer kimniń qolynda degen esh aqparat joq. Ol jeke aqparattar týraly zańǵa qaishy bolyp otyr. Menińshe, jer týraly aqparat jariiaǵa shyǵýy kerek.
Jerdi sheteldikterge satpaimyz dep jatyrmyz. Biraq, sheteldikterdiń úlesi bar firmalar jerdi satyp ala alady, jalǵa ala alady. Bizdiń usynysymyz – sheteldikterdiń úlesi bar firma jerdi jalǵa almasyn, satyp almasyn.
Sosyn progressivti jer salyǵy týraly aitqym keledi. Ol týraly komissiia tóraǵasy da aityp ketti. Bul usynys kelesi salyq kodeksine enedi. Osy usynysty komissiianyń resmi túrde qabyldaýyn usynamyn.
Sońǵy otyrysta Aidyn degen jigit Úrjar máselesin kóterdi. Biz jazbasha aryzyn aldyq, shyǵysqa tekseris jiberdik. Aýyl sharýashylyǵy ministrligi sol tekseris qorytyndysyn jariialaidy dep senemin.
Zańdy qabyldaý bar da, onyń talaptaryn júzege asyrý bar. Elde 144 aýdan bar, 75 komissiia múshesi bar. Komissiia múshelerin aýdandarǵa bólip, sol aýdandardaǵy zańnyń oryndalýyn baqylaityn múmkindik alsaq, esep bersek. Sonda ǵana bizdiń sheshimder júzege asady.
Eń kemi 10 paiyz jer oralmandarǵa qalý kerek. Bolashaqta shet elden qazaqtar keledi. Olarǵa jer qalý kerek.
Prezident jer máselesi kompromispen sheshilýi kerek dep aitty. Jerdi satý, satpaý, shetelge jalǵa berý, bermeýge qatysty túrli kózqaras bar. Eger biz osy máselede kelisimge kele almasaq, moratoriidi bes jylǵa uzartý kerek», - deidi Muhtar Taijan.
Saiasatker sondai-aq, oblys basshysy N. Noǵaevqa ejelgi astana Saraishyq qalasynyń ahýaly týraly ótinish aita kele, jer mitingisine shyqqan azamattardyń taǵdyryn qozǵady.
«24 sáýirdegi mitingte ózińiz boldyńyz. Miting kezinde eshteńe qirap, búlingen joq. Sol mitingide sizdiń janyńyzda turǵan eki azamat túrmede otyr. Ondai miting kóp jerde boldy, biraq, Atyraýdyń jigitteri ǵana túrmege qamalyp otyr. Árine, ol sizdiń qolyńyzda emses, biraq olardy bosatýǵa at salysasyz dep úmittenemin», - dedi Muhtar Taijan oblys basshysyna qarata.
Sonymen qatar, Sheńgeldi, Zarechnyi aýyldarynyń dihandary men turǵyndarynyń jerdi satýǵa, sheteldikterge jalǵa berýge qarsylyq bildirgen hattaryn tapsyrdy.
