اتىراۋ قالاسىندا ءوتىپ جاتقان جەر رەفورماسى جونىندەگى كوميسسيا وتىرىسىندا ساياساتكەر، كوميسسيانىڭ قۇقىقتىق جۇمىس توبىنىڭ جەتەكشىسى مۇحتار تايجان وسىنداي ۇسىنىس تاستادى، - دەپ حابارلايدى Qamshy.kz.
«كوميسسيا جۇمىسى ەلدىڭ نازارىندا. اقىرعى شەشىم قالاي قابىلداناتىنىنا ءبارى الاڭداۋلى. سوندىقتان، جەردى ساتۋ، جالعا بەرۋ ماسەلەلەرىندە كىم قالاي داۋىس بەردى دەگەن اقپاراتتار اشىق بولۋى كەرەك»، - دەيدى مۇحتار تايجان.
كوميسسيا وتىرىسىندا ساياساتكەر تومەندەگى ماسەلەلەرگە نازار اۋدارتتى.
«جايىلىم جەر جەتىسپەي جاتىر. ءار اۋىلدىڭ ايماعىندا ناقتى راديۋس ىشىندە جايىلىم جەر ەشكىمگە جالعا بەرىلمەۋ كەرەك.
ەكىنشى ۇلكەن ماسەلە – قازاقستاندىقتارعا جەردى جالعا بەرۋ. كەيبىرەۋلەر بىلەدى، بىرەۋلەر بىلمەيدى، سوڭعى زاڭناما بويىنشا جەردى جالعا الۋ مۇمكىندىگى الىنىپ تاستالدى. ءبىز سول مۇمكىندىكتى قالدىرۋدى ۇسىنامىز. كەلەسى قادام، لاتيفۋنديزمگە قارسى شارالار. ءبىر ادامعا بەرىلەتىن جەردىڭ كولەمىنە شەكتەۋ ورناتىلادى. اماندىق بولسا، وسى ۇسىنىستار پارلامەنتكە بەرىلەدى.
سونىمەن قاتار، كوميسسياداعى ۇسىنىستار ىشىندە كەلىسپەيتىن جەرلەر دە بار. ماسەلەن، كاداستر ماسەلەسى. ول دەگەن اشىق مالىمەت. ءقازىر جەر كىمنىڭ قولىندا دەگەن ەش اقپارات جوق. ول جەكە اقپاراتتار تۋرالى زاڭعا قايشى بولىپ وتىر. مەنىڭشە، جەر تۋرالى اقپارات جارياعا شىعۋى كەرەك.
جەردى شەتەلدىكتەرگە ساتپايمىز دەپ جاتىرمىز. ءبىراق، شەتەلدىكتەردىڭ ۇلەسى بار فيرمالار جەردى ساتىپ الا الادى، جالعا الا الادى. ءبىزدىڭ ۇسىنىسىمىز – شەتەلدىكتەردىڭ ۇلەسى بار فيرما جەردى جالعا الماسىن، ساتىپ الماسىن.
سوسىن پروگرەسسيۆتى جەر سالىعى تۋرالى ايتقىم كەلەدى. ول تۋرالى كوميسسيا ءتوراعاسى دا ايتىپ كەتتى. بۇل ۇسىنىس كەلەسى سالىق كودەكسىنە ەنەدى. وسى ۇسىنىستى كوميسسيانىڭ رەسمي تۇردە قابىلداۋىن ۇسىنامىن.
سوڭعى وتىرىستا ايدىن دەگەن جىگىت ءۇرجار ماسەلەسىن كوتەردى. ءبىز جازباشا ارىزىن الدىق، شىعىسقا تەكسەرىس جىبەردىك. اۋىل شارۋاشىلىعى مينيسترلىگى سول تەكسەرىس قورىتىندىسىن جاريالايدى دەپ سەنەمىن.
زاڭدى قابىلداۋ بار دا، ونىڭ تالاپتارىن جۇزەگە اسىرۋ بار. ەلدە 144 اۋدان بار، 75 كوميسسيا مۇشەسى بار. كوميسسيا مۇشەلەرىن اۋداندارعا ءبولىپ، سول اۋداندارداعى زاڭنىڭ ورىندالۋىن باقىلايتىن مۇمكىندىك الساق، ەسەپ بەرسەك. سوندا عانا ءبىزدىڭ شەشىمدەر جۇزەگە اسادى.
ەڭ كەمى 10 پايىز جەر ورالماندارعا قالۋ كەرەك. بولاشاقتا شەت ەلدەن قازاقتار كەلەدى. ولارعا جەر قالۋ كەرەك.
پرەزيدەنت جەر ماسەلەسى كومپروميسپەن شەشىلۋى كەرەك دەپ ايتتى. جەردى ساتۋ، ساتپاۋ، شەتەلگە جالعا بەرۋ، بەرمەۋگە قاتىستى ءتۇرلى كوزقاراس بار. ەگەر ءبىز وسى ماسەلەدە كەلىسىمگە كەلە الماساق، ءموراتورييدى بەس جىلعا ۇزارتۋ كەرەك»، - دەيدى مۇحتار تايجان.
ساياساتكەر سونداي-اق، وبلىس باسشىسى ن. نوعايەۆقا ەجەلگى استانا سارايشىق قالاسىنىڭ احۋالى تۋرالى ءوتىنىش ايتا كەلە، جەر ميتينگىسىنە شىققان ازاماتتاردىڭ تاعدىرىن قوزعادى.
«24 ساۋىردەگى ميتينگتە ءوزىڭىز بولدىڭىز. ميتينگ كەزىندە ەشتەڭە قيراپ، بۇلىنگەن جوق. سول ميتينگىدە ءسىزدىڭ جانىڭىزدا تۇرعان ەكى ازامات تۇرمەدە وتىر. ونداي ميتينگ كوپ جەردە بولدى، ءبىراق، اتىراۋدىڭ جىگىتتەرى عانا تۇرمەگە قامالىپ وتىر. ارينە، ول ءسىزدىڭ قولىڭىزدا ەمسەس، ءبىراق ولاردى بوساتۋعا ات سالىساسىز دەپ ۇمىتتەنەمىن»، - دەدى مۇحتار تايجان وبلىس باسشىسىنا قاراتا.
سونىمەن قاتار، شەڭگەلدى، زارەچنىي اۋىلدارىنىڭ ديحاندارى مەن تۇرعىندارىنىڭ جەردى ساتۋعا، شەتەلدىكتەرگە جالعا بەرۋگە قارسىلىق بىلدىرگەن حاتتارىن تاپسىردى.
