Jýrnalist Nazerke Shakirbaeva qazaq ádebietiniń kórnekti ókili, aqyn ári qoǵam qairatkeri Muhtar Shahanovtyń sońǵy amanatyna qatysty jazba jariialady. Onda aqynnyń tiri kezindegi ótinishi men ony oryndaý máselesi sóz bolady, dep habarlaidy Dalanews.kz.
Avtor qoǵamǵa úndeý jasady.
«Qurmetti Muhtar Shahanovty joqtap, otbasyna kóńil aityp jatqan barsha qaýym! Sizderden Muhtar atamyzdyń sońǵy amanatyn oryndaýǵa kómek suraimyz».
Jazbada marqumnyń sońǵy tilegi naqty kórsetilgen. Avtordyń aitýynsha, aqyn týǵan topyraǵyna jerlenýdi qalaǵan.
«Muhtar Shahanovtyń tiri kezindegi sońǵy amanaty – óz ata-babasynyń mekeni Otyrarda, Arystan bab kesenesiniń mańyna jerleý edi».
Bul tilektiń jai ǵana jeke ótinish emes ekeni de atap ótiledi. Avtor muny halyqqa amanat retinde baǵalaidy.
«Bul jai ǵana tilek emes, eliniń ary, namysy bola bilgen rýhty aqynnyń halqyna tilek amanaty».
Nazerke Shakirbaevanyń málimetinshe, aqyn aýyr hálde jatqan sátten bastap jary Hanshaiym Shahanova Qazaqstan Prezidenti Qasym-Jomart Toqaevqa hat joldaǵan. Onda aqynnyń sońǵy amanaty naqty jetkizilgen.
Jýrnalist keshe qaraly habar jetkenin aityp, bul máseleniń ózektiligi artqanyn jetkizedi.
«Endi mine, búgin Muhtar Shahanov dúnieden ótti. Bir dáýir kelmeske ketti. Tirisinde «Shyndyq biiginde jolyǵaiyq» deýden tanbaǵan qairatker aqynnyń sońǵy amanatyn oryndaý – bizge paryz».
Sonymen qatar jazbada Ózbekáli Jánibekov jatqan qorym týraly da aitylady. Avtor aqynnyń sol mańda jerlenýiniń tarihi ári rýhani negizi bar ekenin atap ótedi. Onyń sózinshe, Muhtar Shahanov pen Ózbekáli Jánibekov ulttyq rýhaniiat jolynda birge eńbek etken tulǵalar.
Nazerke Shakirbaeva bul máseleniń aýqymy keń ekenin erekshe atap ótedi.
«Bul – bir otbasynyń, ziialy qaýymnyń ǵana máselesi emes, tutas bir qazaq degen ulttyń óz tulǵasyna degen qurmetiniń kórinisi bolmaq!»
Sondai-aq jazbada hattyń 2026 jylǵy 15 sáýirde E-Ótinish júiesi arqyly Qazaqstan Respýblikasy Prezidenti Ákimshiligine joldanǵany kórsetilgen.
Aita keteiik, 20 sáýirge qaraǵan túni Qazaqstannyń Halyq jazýshysy Muhtar Shahanov 84 jasyna qaraǵan shaǵynda ómirden ótti.
