Almatyda Rozybakıev kóshesin aqyn, qoǵam qaıratkeri Muhtar Shahanov esimine aýystyrý týraly bastama aıasynda jarıalanǵan vıdeo qoǵamda úlken narazylyq týdyrdy. Áleýmettik jelide taraǵan jazbada bloger bul usynysqa qarsy shyǵyp, pikirin dóreki túrde jetkizgen. Osy jaǵdaıǵa baılanysty zańger ári qoǵam belsendisi Meıirman Shókeev málimdeme jasap, mundaı sózderge quqyqtyq turǵyda baǵa berilýi tıis ekenin málimdedi, dep habarlaıdy Dalanews.kz.

Vıdeo avtory óz sózinde kóshe ataýyn ózgertý bastamasyn synap, Muhtar Shahanovqa qatysty teris pikir bildirgen.

"Almatyda Rozybakıev kóshesiniń ataýyn ózgertý týraly petısıa beripti. Qandaı da bir adamnyń atyna aýystyrmaq, tipti onyń atyn ataýdyń ózi qorqynyshty. Ol – Jeltoqsan oqıǵasyna qatysqandardy aqtaǵan revızıonıs. Bul ne sumdyq ózi?",  - degen "mambetador" paraqshasynyń ıesi.

Zańger Meıirman Shókeev bul málimdemeni ulttyq namysqa tıetin áreket retinde baǵalady.

"Qurmetti dostar, bul beınejazbany maǵan kópshilik jiberip jatyr. Atalǵan vıdeoda “Mambetaaddor” paraqshasynyń ıesi ulttyq qundylyqtarǵa til tıgizgen. Muhtar Shahanov – elge eńbegi sińgen tulǵa. Sondyqtan mundaı áreketke jol berýge bolmaıdy. Aıtylǵan sózder ulttyń namysyna tıedi. Sebebi Jeltoqsan oqıǵasy keıinnen quqyqtyq baǵasyn alǵan tarıhı kezeń", - dedi ol.

Sondaı-aq qoǵam belsendisi atalǵan vıdeoǵa baılanysty Qazaqstan Respýblıkasynyń Qylmystyq kodeksiniń 174-baby boıynsha aryz túsiretinin málimdedi.

"Beıjaı qaramaıyq. Men bul beınejazba boıynsha óz atymnan aryz túsiremin. Sizderdi de zań aıasynda áreket etýge shaqyramyn. Mundaı arazdyqty qozdyratyn áreketterge jol bermeýimiz kerek. Keshe bul másele maǵan da kórsetildi, alaıda issaparda bolǵandyqtan, qolym tımedi. Endi atalǵan bap belgileri bar degen negizben aryz túsiremin. Eshkimniń qaralaýyna jol bermeıi", – dep qosty Shókeev.

Qazirgi ýaqytta bul jaǵdaıǵa qatysty resmı organdar tarapynan naqty túsinikteme berilgen joq.