Ult rýhaniiatynyń alyby, qazaq ádebietiniń klassigi Muhtar Áýezov beinelengen sirek fotosýret tabyldy. Kópshilikke buryn beimálim bolyp kelgen bul tarihi kadrda qalamgerdiń qazaqtyń ulttyq ziiatkerlik oiyny — toǵyzqumalaq oinap otyrǵan sáti kórinis tapqan, dep habarlaidy dalanews.kz.
Bul foto tek bir tulǵanyń beinesi ǵana emes, qazaq mádenieti men ulttyq murasynyń tereń bailanysyn aiǵaqtaityn qundy derek. Sýretten Muhtar Áýezovtiń ulttyq óner men dástúrge degen jaqyndyǵyn, halqymyzdyń intellektýaldyq qundylyqtaryna degen qurmetin ańǵarýǵa bolady.
Dúniejúzilik toǵyzqumalaq federatsiiasynyń prezidenti, qoǵam jáne memleket qairatkeri Álihan Baimenovtiń aitýynsha, fotosýret 1950 jyly túsirilgen. Qazirgi tańda sýrettiń túpnusqasy men túsirilgen ornyna qatysty zertteý jumystary júrgizilip jatyr.
“Bul jańalyqtyń mańyzy toǵyzqumalaq álemi úshin de, tulǵalardyń boiyndaǵy mádeni sabaqtastyqty qalyptastyrý úshin de, áýezovtaný álemi úshin de, jalpy zertteýler úshin de óte mańyzdy. Árine biz Muhtar Áýezovtiń toǵyzqumalaq oinyn qaita jandandyrýǵa qosqan úlesin biletinbiz. Keńestik ideologiia qysymymen, jalpy ulttyq rýhaniiat, sonyń ishinde toǵyzqumalaq joǵalyp keter tusta Muhtar Omarhanuly men Qalibek Qýanyshbaev bastap, oiynnyń erejelerin qaita jańǵyrtyp, jarystar ótkizgen. Endi osynyń beine dáleli tabylyp otyr. Buǵan deiin qujattardan bildik te, biz aityp otyrǵan sýreti bolmap edi”,– deidi Álihan Baimenov.
Oiynshylardyń aty beinelengen fotosýrette Muhtar Áýezov, onyń toǵyzqumalaqtaǵy qarsylas oiynshysy jáne túregelip turǵan baqylaýshy men toǵyzqumalaq taqtasy beinelengen. Oiyn barysynda taraptardyń oilanyp otyrǵan sáttegi fotobeineniń astyna “1950 jyl” dep belgi qoiylǵan.
“Bul fotosýret úshin “Almatykitap” baspasynyń qyzmetkerlerine alǵys aitamyz. Sondaǵy toǵyzqumalaq janashyrlary osy beinesýretti taýyp, Qazaqstan toǵyzqumalaq sporty federatsiiasynyń vitse-prezidenti, Binom mektepter jelisiniń basshysy Sholpan Qadyrovaǵa habarlasyp, súiinshilegen. Munyń bizdiń qolymyzǵa tigenine eki-úsh kún ǵana boldy”,– deidi Dúniejúzilik toǵyzqumalaq federatsiiasynyń prezidenti Álihan Baimenov.
Jetisý oblysynyń ortalyǵy Taldyqorǵan qalasynda toǵyzqumalaq ardagerleri arasynda respýblikalyq týrnir ótip jatyr. Elimizdiń barlyq óńirinen júzdegen toǵyzqumalaq qairatkerleri men ardagerleri jinalǵan sharanyń ashylý saltanatynda belgili sport jýrnalisi, Almaty oblysynyń qurmetti azamaty, Táýelsiz Qazaqstan toǵyzqumalaq sporty federatsiiasynyń tuńǵysh prezidenti, biyl 75 jas mereitoiyn atap ótip jatqan Nesip Júnisbaiulyna osy fotosýret estelik retinde syiǵa berildi.
Toǵyzqumalaq — halqymyzdyń ǵasyrlar boiy jalǵasqan ziiatkerlik murasy. Al ony Muhtar Áýezov sekildi uly tulǵanyń oinap otyrǵan sáti ulttyq tarihymyz úshin erekshe jańalyq. Aldaǵy ýaqytta fotosýretke qatysty tyń málimetter men zertteý nátijeleri jariialanatyn bolady.
