Eks-ministr Baǵdat Mýsinniń "Astana internet jyldamdyǵy jaǵynan Tokiodan ozdy" degen málimdemesi biraz ýaqyt el arasynda qyzý talqyǵa túsip edi. Mýsin ketse de Qazaqstannyń interneti Reseiden alda bolyp shyqty,- dep habarlaidy Dalanews.kz.
Úkimet otyrysynda tsifrlyq damý ministri Jaslan Mádiev elimizde bailanys sapasyn odan ári jaqsartý barysy týraly baiandady.
Onyń aitýynsha, Qazaqstanda internetti qoldananatyn halyqtyń úlesi damyǵan elder deńgeiinde. Respýblikada trafiktiń ósýi 2020 jylǵa qaraǵanda 61,5%-ǵa, al abonentter sany 12,9%-ǵa ósti.
Speedtest Ookla-nyń 2024 jylǵy sáýirdegi derekterine sáikes, elimiz internettiń ortashy jyldamdyǵy boiynsha – 43,6 Mbit/s, álem boiynsha 66-orynda. Bul Resei, Qyrǵyzstan jáne Ózbekstannan joǵary kórsetkish.
Mádiev Qazaqstandaǵy 6 290 aýyldyń ishinde symdy internet arqyly optika 2 606 aýylǵa jetkizilgenin málimdedi. Endi 3010 aýylǵa optikalyq bailanys jelilerin qosý kózdelýde. Nátijesinde 2,4 mln adamnyń internetke qoljetimdiligin qamtamasyz etilmek.
"Bailanys operatorlarynan 340 mlrd teńgeden astam kólemde jeke investitsiia tartý kózdelip otyr. Mobildi internet búginde 4 866 aýylda qoljetimdi. Salyq jeńildikteri aiasynda 2023 jyly 1 161 aýyl 4G tehnologiiasyna qosyldy. Qalǵan 1 424 aýyl boiynsha jumys jalǵasýda", - dedi ministr.
Al Astana, Almaty, Shymkent jáne oblys ortalyqtarynda 5G bailanyspen qamtýdy keńeitý boiynsha jumystar jalǵasady.
"Búgingi tańda 20 qalada 1 144 bazalyq stansa ornatylǵan. Memleket basshysynyń tapsyrmasyna sáikes 5G uialy bailanysyn engizý 2025 jyldyń sońyna deiin aiaqtalýy tiis. 2027 jyldyń sońyna deiin uialy bailanys operatorlary telekommýnikatsiia salasyna 450 mlrd teńgeden astam investitsiia salatyn bolady", - delingen ministrdiń esebinde.
