مۋسين "توكيو" دەپ شالىس باسسا دا قازاقستاننىڭ ينتەرنەتى رەسەيدەن الدا بوپ شىقتى

ساعىنىش سارداروۆا 18 ماۋ. 2024 11:48 2456

ەكس-مينيستر باعدات ءمۋسيننىڭ "استانا ينتەرنەت جىلدامدىعى جاعىنان توكيودان وزدى" دەگەن مالىمدەمەسى ءبىراز ۋاقىت ەل اراسىندا قىزۋ تالقىعا ءتۇسىپ ەدى. مۋسين كەتسە دە قازاقستاننىڭ ينتەرنەتى رەسەيدەن الدا بولىپ شىقتى،- دەپ حابارلايدى Dalanews.kz.

ۇكىمەت وتىرىسىندا سيفرلىق دامۋ ءمينيسترى جاسلان مادييەۆ ەلىمىزدە بايلانىس ساپاسىن ودان ءارى جاقسارتۋ بارىسى تۋرالى باياندادى.

ونىڭ ايتۋىنشا، قازاقستاندا ينتەرنەتتى قولداناناتىن حالىقتىڭ ۇلەسى دامىعان ەلدەر دەڭگەيىندە. رەسپۋبليكادا ترافيكتىڭ ءوسۋى 2020 جىلعا قاراعاندا 61،5%-عا، ال ابونەنتتەر سانى 12،9%-عا ءوستى.

Speedtest Ookla-نىڭ 2024 جىلعى ساۋىردەگى دەرەكتەرىنە سايكەس، ەلىمىز ينتەرنەتتىڭ ورتاشى جىلدامدىعى بويىنشا – 43،6 مبيت/س، الەم بويىنشا 66-ورىندا. بۇل رەسەي، قىرعىزستان جانە وزبەكستاننان جوعارى كورسەتكىش.

مادييەۆ قازاقستانداعى 6 290 اۋىلدىڭ ىشىندە سىمدى ينتەرنەت ارقىلى وپتيكا 2 606 اۋىلعا جەتكىزىلگەنىن مالىمدەدى. ەندى 3010 اۋىلعا وپتيكالىق بايلانىس جەلىلەرىن قوسۋ كوزدەلۋدە. ناتيجەسىندە 2،4 ملن ادامنىڭ ينتەرنەتكە قولجەتىمدىلىگىن قامتاماسىز ەتىلمەك.

"بايلانىس وپەراتورلارىنان 340 ملرد تەڭگەدەن استام كولەمدە جەكە ينۆەستيسيا تارتۋ كوزدەلىپ وتىر. ءموبيلدى ينتەرنەت بۇگىندە 4 866 اۋىلدا قولجەتىمدى. سالىق جەڭىلدىكتەرى اياسىندا 2023 جىلى 1 161 اۋىل 4G تەحنولوگياسىنا قوسىلدى. قالعان 1 424 اۋىل بويىنشا جۇمىس جالعاسۋدا"، - دەدى مينيستر.

ال استانا، الماتى، شىمكەنت جانە وبلىس ورتالىقتارىندا 5G بايلانىسپەن قامتۋدى كەڭەيتۋ بويىنشا جۇمىستار جالعاسادى.

"بۇگىنگى تاڭدا 20 قالادا 1 144 بازالىق ستانسا ورناتىلعان. مەملەكەت باسشىسىنىڭ تاپسىرماسىنا سايكەس 5G ۇيالى بايلانىسىن ەنگىزۋ 2025 جىلدىڭ سوڭىنا دەيىن اياقتالۋى ءتيىس. 2027 جىلدىڭ سوڭىنا دەيىن ۇيالى بايلانىس وپەراتورلارى تەلەكوممۋنيكاسيا سالاسىنا 450 ملرد تەڭگەدەن استام ينۆەستيسيا سالاتىن بولادى"، - دەلىنگەن ءمينيستردىڭ ەسەبىندە.


ۇسىنىلعان
سوڭعى جاڭالىقتار