Astanada eks-ministr Qýandyq Bishimbaevqa qatysty sot protsesi jalǵasýda. Búgin aiyptalýshy tarap sottan Saltanat Núkenova jazǵan málimdemeni is materialdaryna qosýdy surady, dep habarlaidy Dalanews.kz.
Bishimbaevtyń advokattarynyń biri Erlan Ǵazymjanov Saltanat Núkenovanyń jazǵan málimdemesin oqydy.
"Ol (Saltanat) oǵan ótinish jazǵan. Munda ol senimdi qalpyna keltirýge ýádesin bergen. Atap aitqanda, qoiyn dápterde Núkenovanyń óz qolymen jazǵan jazbasy bar", - dedi Ǵazymjanov.
Osy tusta sottalýshynyń qorǵaýshysy kelesi mátindi oqydy:
"Men, Saltanat Núkenova, Qýandyqtyń senimin qalpyna keltirýge jáne ony qyzǵanbaýǵa ýáde beremin. Psihologqa únemi baryp turýǵa, ózimmen jáne senimdiligimmen jumys isteýge ýáde beremin. Shynaiy bolamyn, Qýandyqty syilaimyn jáne aitqanyn eki etpeimin. Otbasynyń oshaǵyn qorǵaityn aiaýly da qamqor jar bolamyn. Ant beremin, balaǵat sóz aitpaimyn. Olai bolǵan jaǵdaida, túsinistik tanytyp, birden ózimdi qolǵa alamyn. Onyń pikirine jáne maǵan jaqsylyq tileitinine senemin. Súiikti Qýandyǵyma qamqorlyq jasaýǵa, ony qurmetteýge, árqashan qoldaý kórsetýge mindetti bolamyn. Qýandyqpen birge namaz oqyp, sana-sezimimmen jumys isteimin. Rýhani ósemin ári Allahtyń qalaýymen otbasymyzdy jáne mahabbatymyzdy saqtap qalýǵa tyrysamyn".
Bishimbaevtyń advokattary Saltanat Núkenova jazǵan bul hat Bishimbaevtyń azaptaýyn joqqa shyǵarady dep esepteidi.
Alaida hat mátini sýdia Aijan Qulbaevany tańǵaldyrdy jáne ol advokattarǵa suraq qoidy.
"Ary qarai jalǵastyrmas buryn bir suraq qoiǵym keledi: kúieýine mundai mindettemeni áieli jazady ma? Muny qalai túsinýge bolady? Men áieldiń kúieýine osylai jazǵanyn birinshi ret kórip turmyn", - dedi Qulbaeva.
Qorǵaýshy tarap sottan hatty is materialdaryna qosýdy surady. Bishimbaev bul ótinishti qoldady, al ekinshi sottalýshy Baqytjan Baijanov sheshimdi sotqa qaldyrdy.
Zardap shekken taraptyń advokaty Igor Vranchev óziniń ishki kúiin jasyra almady.
"Qurmetti sot, advokat Ǵazymjanov aitqandai, biz áieldiń kúieýine ótinish jazǵanyn baiqadyq. Basty sot protsesi aiaqtalǵansha Saltanat Núkenovanyń taǵy bir málimdemesi paida bolsa, tańǵalmaimyn. Bálkim, birden sotqa jáne alqabilerge barlyǵyna ájethana kináli dep júgingen shyǵar", - dedi Vranchev.
Sýdia Qulbaeva atalmysh málimdemeni is materialdaryna engizýge ruqsat bermedi.
