Ulttyq Bank 2024 jyldyń qarasha aıyndaǵy Aqsha-kredıt saıasaty týraly kezekti qujatty jarıalady. Munda el ekonomıkasynyń negizgi makroekonomıkalyq kórsetkishteri nasharlaý turǵysynda qaıta qarastyrylǵan. Retteýshi organ ınflásıalyq faktorlarǵa baılanysty bazalyq mólsherleminiń joǵary deńgeıi uzaqqa saqtalatynyn,al munaı baǵasynyń tómendeýinen JİÓ ósimi baıaýlaıtynyn boljaıdy, dep jazady Dalanews.kz.
INFLÁSIA
Aǵymdaǵy ınflásıa dınamıkasy Ulttyq Banktiń boljamdaryna sáıkes qalyptasyp
keledi, biraq ınflásıany 5% deńgeıindegi maqsatqa turaqty tómendetý traektorıasynan
aýytqý belgileri baıqalyp otyr.
Qujatta kórsetilgen derekterge sáıkes, ekonomıkadaǵy ınflásıalyq qysymnyń saqtalýy myna faktorlarmen baılanysty:
- ósip jatqan fıskaldyq yntalandyrý kólemi,
- TKSH reformasy aıasyndaǵy tarıfterdiń ósýi,
- syrtqy ınflásıalyq qysym,
- joǵary ınflásıalyq kútýler.
"Joǵary ishki ınflásıalyq faktorlardyń saqtalýy jáne syrtqy alǵysharttardyń kúsheıýi
jaǵdaıynda 2025-2026 jyldarǵa arnalǵan ınflásıa dınamıkasy boıynsha boljamdar
sál joǵary qaraı qaıta qaraldy. Degenmen, ortasha qatań aqsha-kredıt saıasatynyń júzege asyrylýyna baılanysty ýaqytsha faktorlardyń áserinen tazartylǵan bazalyq ınflásıa (toqs./toqs., SA) 2026 jyldyń sońyna qaraı 5%-ǵa deıin baıaýlaıdy, bul 2027 jyly jyldyq ınflásıanyń maqsatty deńgeıine jaqyndaýyna yqpal etedi.
Osylaısha: 2024 jyly ınflásıa 8-9% deńgeıinde, 2025 jyly – 6,5-8,5% aralyǵynda, 2026 jyly – 5,5-7,5% sheginde, 2027 jyly 5%-ǵa jaqyndaıdy dep boljanýda", delingen Ulttyq banktiń jańartylǵan Aqsha-nesıe saıasaty týraly toqsan saıynǵy baıandamasynda.
2024 jylǵa arnalǵan ınflásıa boıynsha boljam 8-9%-ǵa deıin naqtylandy. 2025 jyly
fıskaldyq ımpúlstiń jáne basqa faktorlardyń kúsheıýine baılanysty ınflásıanyń 6,5-8,5% aralyǵynda joǵary deńgeıi kútilýde. 2026 jyly ortasha qatań aqsha-kredıt saıasaty baǵanyń ósýin 5,5-7,5% deıin baıaýlatýǵa yqpal etedi. Jalpy ınflásıa 2027 jyly maqsatqa jaqyn qalyptasady dep kútilýde.
Inflásıanyń negizgi táýekelderi ishki suranystyń artýymen, syrtqy ınflásıalyq
qysymmen, retteletin baǵanyń ósýimen jáne búdjet tapshylyǵyn jabýdaǵy belgisizdikpen
baılanysty.
BAZALYQ MÓLSHERLEME
Ulttyq banktiń Aqsha-kredıt saıasaty komıteti bazalyq mólsherlemeni 15,25%-ǵa deıin
kóterý týraly sheshim qabyldady. Sheshim ınflásıa men ekonomıkalyq ósýdiń
jańartylǵan boljamdaryn, sondaı-aq naqty derekter men táýekel balansyn taldaýdy
eskere otyryp qabyldandy.
"Tek 2025 jyldyń sońyna qaraı bazalyq mólsherleme 13,75% deńgeıinde qalyptasýy múmkin (aldyndaǵy boljamda 11,9% dep kórsetilgen)", delingen qujatta.
EKONOMIKALYQ ÓSİM nemese JİÓ
Ekonomıkanyń 2024 jylǵa arnalǵan ósý boljamy 4-4,5% deńgeıinde naqtylandy. 2025-2026 jyldary JİÓ ósimi boıynsha kútýler ótken boljammen salystyrǵanda ózgeristerge
ushyrady. Ekonomıkalyq belsendiliktiń ósýi 2025 jyly 4,5-5,5%, 2026 jyly – 4,6-5,6%, 2027 jyly – 3,3-5,3% dıapazonynda bolady dep boljanýda.
"Ekonomıkalyq belsendiliktiń ósýi 2024 jyldyń alǵashqy jartyjyldyǵynda
aıtarlyqtaı baıaýlaýdan keıin (alty aıdaǵy ósim 3,2%) úshinshi toqsanda jyldamdady,osylaısha toǵyz aıdaǵy JİÓ ósimi 4,1%-dy qurady. 2024 jyldyń ekinshi toqsanyndaǵy belsendiliktiń baıaýlaýyna negizgi sebep úı sharýashylyqtarynyń tutynýynyń shamaly tómendeýi, jalpy qorlanym dınamıkasyndaǵy teris úrdis jáne memlekettik basqarý organdarynyń tutynýynyń nasharlaýy boldy. Soǵan qaramastan, úı sharýashylyqtarynyń suranysy ekonomıkalyq ósimniń negizgi qozǵaýshy kúshi bolyp qala beredi jáne ekonomıkaǵa ınflásıalyq yqpalyn tıgizýdi jalǵastyrýda. Jyl sońyna qaraı JİÓ ósimi ishki suranystyń arqasynda aǵymdaǵy qarqynyn saqtap, 4-4,5% aralyǵynda qalyptasady dep kútilýde", - deıdi Ulttyq bank óz boljamynda.
2024 jyldyń tórtinshi toqsanynda munaı óndirisiniń qysqarýyna baılanysty eksport ósimi
biraz baıaýlaıdy dep boljanýda. Osylaısha, ishki suranys dınamıkasynyń birtindep
jedeldeýi munaı sektorynyń nasharlaýymen ishinara óteledi. Nátıjesinde, bıylǵy jylǵa
arnalǵan boljam 4-4,5% deńgeıine deıin taryldy.
"2025-2026 jyldarǵa arnalǵan JİÓ ósimi boljamy tómendetildi. Bul munaı baǵasynyń senarılik tómendeýine, sondaı-aq tutynýshylyq nesıeleý ósiminiń birshama baıaýlaýyna baılanysty ishki suranys dınamıkasynyń qysqarýymen túsindiriledi. Soǵan qaramastan, ishki suranys boljamdyq kezeńniń barlyq merziminde fıskaldyq yntalandyrý aıasynda áleýetti deńgeıden joǵary qarqynmen ósip, ınflásıalyq sıpatqa ıe bolady".
MUNAI
"Ekonomıkanyń damý perspektıvalary álemdik munaı naryǵyndaǵy artyq usynysqa qatysty alańdaýshylyqty meńzeı otyryp,tómendeý úrdisin kórsetti. "2024 jylǵy qarasha" boljamdy raýndynyń bazalyq senarıi aıasynda álemdik munaı naryǵyndaǵy teńgerimsizdik jaǵdaıynda ortamerzimdi perspektıvada munaı baǵasy barel úshin 70 AQSH dollarǵa deıin tómendeıdi dep kútilýde",delinedi qujatta.
Tómende Ulttyq banktiń negizgi makroekonomıkalyq kórsetkishter boıynsha pesımısik jáne optımısik senarı boıynsha boljamdar kestesin usynyp otyrmyz:
