Qazaqstan naýryzdyń ortasynda koronavirýs taraǵan tusta halyqaralyq áýe reisteri men jolaýshylar avtobýsyn elge kirgizýdi toqtatqan.
Qoldaryna Qazaqstan pasportyn ustap turǵandardyń biri: «Naýryz aiynda Mońǵoliiaǵa kelgen edik. Koronovirýsqa bailanysty qaita almai qaldyq. Ol jaqta bireýimizdiń týysymyz, bireýimizdiń baýyrymyz, bireýimizdiń balamyz qaldy» deidi.
Mońǵoliiada qalyp qoiǵan Qazaqstan azamaty Orazai Ǵalymbekuly Azattyqqa Mońǵoliiadan Qazaqstanǵa qaita almai otyrǵandar júzden asatynyn aitty. Onyń jyrtysynan kóbi Baian-Ólgei aimaǵynda, qalǵandary Mońǵoliia astanasy Ýlanbator qalasynda ekenin alǵa tartty.
– Naýryz aiynda atam qaitys bolyp, soǵan kelgen edim. Qazaqstanda, Aqmola oblysynda aiaǵy aýyr áielim qalǵan edi. Jaqynda ýaqytynan buryn bosandy. Qazir otbasyma jete almai otyrmyn, – deidi Ǵalymbekuly.
Mońǵoliiadan qaita almai qalǵan Qazaqstan azamaty baryn Syrtqy ister ministrliginiń baspasóz qyzmetiniń jetekshisi Aibek Smadiiarov ta rastady. Ministrlik ókiliniń aitýynsha, Mońǵoliiada qalǵandardyń qazirshe naqty sany belgisiz. 22 mamyr kúni Qazaqstannyń Mońǵoliiadaǵy elshisi Jalǵas Ádilbaev Baian-Ólgei aimaǵyna baryp, qaita almai qalǵandarmen kezdesip qaitqan.
– Qazir Mońǵoliia-Resei taraptarymen kelissóz júrgizilip, olardy avtobýspen álde ushaqpen ákelý máselesi qarastyrylyp jatyr. Ushaq qondyrýǵa Baian-Ólgeidiń áýejaiy yńǵaisyz, kóp ushaqtyi qabyldai bermeidi jáne ol jaqta qalǵandardyń barlyǵy birdei ushaqtyń qarjysyn óteýge qaýqarsyz. Al avtobýspen alyp qaitý úshin eki eldiń arasyna arnaiy dáliz jasaý kerek. Ol úshin Máskeýmen kelisý kerek. Sondyqtan da olardy alyp qaitý máselesi kesheýildep jatyr, – dedi Smadiiarov Azattyqqa.
Mońǵoliianyń batysynda ornalasqan Baian-Ólgei aimaǵynda qazir shamamen 100 myńdai qazaq turady.
