Belgili aktrisa, prodiýser ári ánshi Dariǵa Badyqova jelide jappai taraǵan videosyna qatysty pikir bildirdi, dep habarlaidy Dalanews.kz.
Óner iesi atalǵan pikirin ázilmen jetkizgenin málimdedi.
“Bul pikirimdi jalpy Gollivýdqa qatysty aitqan edim. Halyq bizdi qoldaidy degen úmitpen, qaljyń retinde jetkizdim. Atalǵan videonyń ne basy, ne aiaǵy joq, qysqartylyp tarap ketken. Esesine, osy arqyly Moanaǵa da jarnama jasap berdim”, — dedi óner iesi Dalanews.kz agenttigine.
Sonymen qatar prodiýser jaqynda jaryq kórgen týyndysy alǵashqysynan da áserli bolǵanyn atap ótti. Aitýynsha, film kóptiń kóńilinen shyǵyp jatyr.
“Ekinshi bólim óte áserli shyqqan ári úlken maǵynaǵa ie. Jaqsyny kórmekke degendei, kórermenderge unap jatyr”, — dep qosty ol.
Aita keteiik, óner iesiniń “Taptym-aý seni” filminiń jalǵasy gollivýdtyq “Moana 2” mýltfilmimen qatar kórermenge jol tartqan edi. Osy tusta aktrisa gollivýdtyq “Moana” mýltfilmine barǵan qazaqstandyqtardy synǵa alǵan bolatyn.
Óner iesi halyqtan ózge emes, óz eliniń týyndylaryna qoldaý bildirýin surady.
“Moanaǵa" baryp "pozor" bolmaiyq. Bóten elge aqshany jiberip, olardy baiytýdy qoiǵanymyz durys. Ashyǵyn aitamyn, 27 qarashada “Moanaǵa” barǵan qazaqtar boldy. Alaida olardy sókpeimin. Tek qandai qazaq ekenin túsinbeimin. Sondyqtan baiysa, qazaq baiysyn. Eshteńe joq”, – dedi aktrisa.
Al jeli qoldanýshylary túrli pikirdi jarysa jazýda. Biri aktrisanyń aitqanyn jón dep sanasa, endi biri oǵan qarsy shyǵyp jatyr.
“Árkim óz tańdaýy men ýaqytyna bailanysty mýltfilmdi de, qazaqstandyq filmdi de tamashalai alady. Óz basym ishim tar emes… Qarapaiym halyq sheteldi de, Qazaqstandy da asyrap keledi..”, “Árine óz elińniń óner ielerine qoldaý bildirý kerek. Ózimizden shyqan dúniege mán bergen durys”,
“Jaqsy kino túsirse, nege barmasqa?”, — dep jazdy kópshilik.
Eske salaiyq, byltyr óner iesi "Taptym-aý seni" filmin 108 mln teńgege túsirgen bolatyn. Al týyndynyń tabysy milliard teńgege jýyq kassa jinady.
