بەلگىلى اكتريسا، پروديۋسەر ءارى ءانشى داريعا بادىقوۆا جەلىدە جاپپاي تاراعان ۆيدەوسىنا قاتىستى پىكىر ءبىلدىردى، دەپ حابارلايدى Dalanews.kz.

ونەر يەسى اتالعان پىكىرىن ازىلمەن جەتكىزگەنىن مالىمدەدى.

“بۇل پىكىرىمدى جالپى گولليۆۋدقا قاتىستى ايتقان ەدىم. حالىق ءبىزدى قولدايدى دەگەن ۇمىتپەن، قالجىڭ رەتىندە جەتكىزدىم. اتالعان ۆيدەونىڭ نە باسى، نە اياعى جوق، قىسقارتىلىپ تاراپ كەتكەن. ەسەسىنە، وسى ارقىلى مواناعا دا جارناما جاساپ بەردىم”، — دەدى ونەر يەسى Dalanews.kz اگەنتتىگىنە.

سونىمەن قاتار پروديۋسەر جاقىندا جارىق كورگەن تۋىندىسى العاشقىسىنان دا اسەرلى بولعانىن اتاپ ءوتتى. ايتۋىنشا، فيلم كوپتىڭ كوڭىلىنەن شىعىپ جاتىر.

“ەكىنشى ءبولىم وتە اسەرلى شىققان ءارى ۇلكەن ماعىناعا يە. جاقسىنى كورمەككە دەگەندەي، كورەرمەندەرگە ۇناپ جاتىر”، — دەپ قوستى ول.

ايتا كەتەيىك، ونەر يەسىنىڭ “تاپتىم-اۋ سەنى” ءفيلمىنىڭ جالعاسى گولليۆۋدتىق “موانا 2” مۋلتفيلمىمەن قاتار كورەرمەنگە جول تارتقان ەدى. وسى تۇستا اكتريسا گولليۆۋدتىق “موانا” مۋلتفيلمىنە بارعان قازاقستاندىقتاردى سىنعا العان بولاتىن.

ونەر يەسى حالىقتان وزگە ەمەس، ءوز ەلىنىڭ تۋىندىلارىنا قولداۋ ءبىلدىرۋىن سۇرادى.

“مواناعا" بارىپ "پوزور" بولمايىق. بوتەن ەلگە اقشانى جىبەرىپ، ولاردى بايىتۋدى قويعانىمىز دۇرىس. اشىعىن ايتامىن، 27 قاراشادا “مواناعا” بارعان قازاقتار بولدى. الايدا ولاردى سوكپەيمىن. تەك قانداي قازاق ەكەنىن تۇسىنبەيمىن. سوندىقتان بايىسا، قازاق بايىسىن. ەشتەڭە جوق”، – دەدى اكتريسا. 

ال جەلى قولدانۋشىلارى ءتۇرلى پىكىردى جارىسا جازۋدا. ءبىرى اكتريسانىڭ ايتقانىن ءجون دەپ ساناسا، ەندى ءبىرى وعان قارسى شىعىپ جاتىر.

“اركىم ءوز تاڭداۋى مەن ۋاقىتىنا بايلانىستى ءمۋلتفيلمدى دە، قازاقستاندىق ءفيلمدى دە تاماشالاي الادى. ءوز باسىم ءىشىم تار ەمەس… قاراپايىم حالىق شەتەلدى دە، قازاقستاندى دا اسىراپ كەلەدى..”، “ارينە ءوز ەلىڭنىڭ ونەر يەلەرىنە قولداۋ ءبىلدىرۋ كەرەك. وزىمىزدەن شىقان دۇنيەگە ءمان بەرگەن دۇرىس”،
“جاقسى كينو تۇسىرسە، نەگە بارماسقا؟”، — دەپ جازدى كوپشىلىك.

ەسكە سالايىق، بىلتىر ونەر يەسى "تاپتىم-اۋ سەنى" ءفيلمىن 108 ملن تەڭگەگە تۇسىرگەن بولاتىن. ال تۋىندىنىڭ تابىسى ميلليارد تەڭگەگە جۋىق كاسسا جينادى.