Mysyr tarapy Sharm-el-Sheih áýejaiynda qaza tapqan qazaqstandyq azamatshanyń denesin elge jetkizýdi uiymdastyrady. Bul týraly QR Syrtqy ister ministriniń orynbasary Álibek Qýantyrov málimdedi, dep habarlaidy Dalanews.kz.
– Búgin, 21 mamyrda, marqumnyń denesi Qazaqstanǵa jetkizilýi kerek. Qazirgi tańda barlyq jumys úilestirilip jatyr, konsýl sol jerde, jaǵdaidy baqylaýda ustap otyr. Mysyrdyń azamattyq aviatsiia ministri de kóńil aityp, arnaiy komissiia qurylǵanyn habarlady. Olar máiitti tasymaldaý shyǵyndaryn ózderi óteidi. Buǵan qosa, qazaqstandyq saqtandyrý kompaniiasy da keibir shyǵyndardy jabady. Al moraldyq ótemaqy máselesi sheshilgen. Biraq onyń naqty somasyn aitý – jeke sipattaǵy dúnie, sondyqtan pikir bildirý durys emes, – dedi Qýantyrov májilis kýlýarynda.
Alaida ol otbasyna ótemaqyny naqty kim tóleitini jaily naqtylai almady.
Eske salaiyq, 18 mamyrda Sharm-el-Sheih áýejaiynda Astanaǵa ushatyn reiske otyrǵyzý kezinde jarnama qalqany úsh qazaqstandyqtyń ústine qulaǵany belgili boldy. Olardyń biri alǵan jaraqatynan oqiǵa ornynda qaza tapty, qalǵan ekeýi jaraqat aldy.
