Metsenattar Uzynaǵashta Jambylǵa jańa eskertkish ornatty
Almaty oblysy Jambyl aýdanynyń ortalyǵy Uzynaǵash aýylynda «Rýhani jańǵyrý» baǵdarlamasy sheńberinde jyrshy, jyraý Jambyl Jabaevtyń eńseli eskertkishi ashyldy. Onyń saltanatty ashylýyna aýdan jurtshylyǵy men ardagerleri qatysyp, oblys ákimi Amandyq Batalov arnaiy bardy, – dep habarlaidy Almaty oblysy ákiminiń baspasóz qyzmeti.
Oblys ákimi A.Batalov óz quttyqtaýynda:
– «Rýhani jańǵyrý» baǵdarlamasy aiasynda jastarǵa úlgi bolarlyq úlken jumystar atqarylýda. Búgin Uly babamyz, maqtanyshymyz Jambyl aqynnyń eńseli eskertkishi metsenattardyń qoldaýymen, Áskerbek Abaev aǵamyz bastaǵan azamattardyń uiytqy bolýymen ashyldy. Osyndai eskertkishti eń aldymen Astana qalasynda, keiin Kievte, Belgradta ornattyq. Búgin mine, demeýshilerdiń kómegimen Jambyl aýdanynda jalǵasyp otyr. Elbasynyń «Rýhani jańǵyrý» baǵdarlamasy osyndai igi isterge úlken serpin berdi. Qarasai, Alakól aýdandarynda, Taldyqorǵanda osy baǵytta iri-iri jobalar qolǵa alynyp jatyr. Onyń ishinde deneshynyqtyrý jáne saýyqtyrý keshenderi, olimpiadalyq standartpen salynatyn bassein, jeńil atletika maneji siiaqty sport nysandary bar. Mundai bastamalar barlyq aýdanda atqaryla bastady. Jýyrda oblysqa kelgen saparynda Elbasymyz óńirdegi atqarylyp jatqan isterge oń baǵa berdi. Osy berilgen baǵada Jambyl aýdany halqynyń úlesi zor dep bilemin. Birligimiz bekem bolsyn, babamyzdyń eskertkishi qutty bolsyn, – dedi. Sonymen qatar oblys basshysy óz sózinde aýyldyń joldaryn jóndeýge, abattandyrýǵa qoldaý kórsetilip otyrǵanyn da tilge tiek etti.
Munan soń «Týǵan jerge taǵzym» qorynyń tóraǵasy Áskerbek Abaev sóz aldy.
– Aýdannyń Qastek aýdany bolyp qurylǵanyna – 90 jyl, Jambyl ataýy berilgenine 80 jyl tolyp otyr. Osy mereili dataǵa orai aýdan ortalyǵyna Jambyl baba eskertkishin ornatý týraly kópshilik bastama kóterip, aýdandyq máslihat depýtattary usynys aityp, bul usynys oblys basshysy tarapynan qoldaý tapty. Sóitip, «Týǵan jerge taǵzym» qory quryldy. Qorǵa qarjy jinaqtap, osy eskertkishtiń ashylýyna uiytqy bolǵan azamattarǵa, qoldaý bildirgen oblys basshylyǵyna alǵys aitamyn, – dedi Á.Abaev. Osy mazmundas izgi tilegin tuńǵysh Olimpiada chempiony, kásipker Jaqsylyq Úshkempirov te arnady.
Quttyqtaý tilekterden soń eskertkishtiń jabýy ashylyp, shashý shashylyp, saltanat aýdan ónerpazdarynyń kontsertine ulasty.
Esterińizge salar bolsaq, aqynnyń qolynda dombyrasyn ustap turǵan eńseli eskertkishiniń avtory – Qazbek Jarylǵapov. Qola músin «Týǵan jerge taǵzym» qoǵamdyq qorynyń qarjysyna turǵyzylǵan. «Aqyndar men batyrlar eli» parkimen birge tutas keshendi qurap turǵan eskertkish Uzynaǵashtyń kire berisinde ornatylǵan. Bul parktiń qurylysyn «Arnaiy qurylys kompaniiasy» JShS júrgizip, bul jumystarǵa qordyń 60,4 mln teńgege jýyq qarjysy jumsalǵan.
Almaty oblysy ákiminiń baspasóz qyzmeti
https://dalanews.kz/31310
