Merkel: «Shetel asqan aqsha? Villany Qazaqstanǵa ákele almaisyń»
Shynymen, sheteldiń bankterinde jatqan, bolmasa múlik retinde «óńin ózgertken» milliardtar qashan qaitady? Buǵan Merkel bylai dep jaýap beripti.
– Bul – óte kúrdeli másele. BUU-nyń aiasynda korrýptsiiaǵa, transulttyq qylmysqa jáne esirtkige qarsy konventsiialar bar. Biraq, bul qujattar usynys negizinde júredi jáne kóp elder bulardy qoldanýǵa kelise bermeidi. Osy konventsiialar aiasynda qansha jerden jumys isteýge tyrysqanymyzben, túk shyǵara almadyq. Shetelge ketken aqshany qaitarý úshin ekijaqty kelisimsharttar kerek.
Jaqynda Ulybritaniiamen dál osyndai kelisimshartqa qol qoidyq. Bul qujatta kapitaldy qaitarýǵa qatysty tiisti normalar bar. Soǵan sai memlekettiń qarjysy urlanǵan bolsa, ol tolyqtai qaitarylady. Biraq, ony bir kúnde oryndai almaisyń. Memleketten urlanǵan aqshaǵa negizinen jyljymaityn múlik alynyp qoiǵan, aqshany soǵan salǵan. Al alyp villany Qazaqstanǵa ákele almaisyń. Ony satpas buryn, aldymen baǵalaý qajet. Bul – úlken jumys.
Shetelge ketken aqshany aqyr túbinde qaitarýǵa bolady. Biraq, bul úshin aldymen ol aqshanyń shynymen de memleketke tiesili ekenin jáne Qazaqstannan zańsyz alynyp shyǵarylǵanyn dáleldeýge tiispiz. Bul da – uzaq jumys. Kedergiler kóp. Óitkeni ár eldiń zańy basqa.
