Memleket basshysy Túrkiiadaǵy biznes ókilderiniń basqosýynda jańa Qazaqstandy qurýǵa kiriskenin aityp, saiasi júieni tolyq jańǵyrtatynyn atap ótti. Ol "Sýperprezidenttik" basqarýdan myqty parlamenti bar prezidenttik respýblika júiesine birtindep ótetinin jetkizdi.
"Biyl besinshi maýsymda jalpyhalyqtyq referendým ótkiziletin boldy. Konstitýtsiiamyzdyń 33 babyna túzetýler engiziledi. Meniń maqsatym – halqyma meilinshe erkindik berý, demokratiia men zań ústemdigin kúsheitý.
Prezident retinde eshqandai artyqshylyqtar men jeńildikterge qumar emespin. Mundaidy qalamaimyn"
– dedi Memleket basshysy.
Sondai-aq Prezident ulttyq ekonomika túbegeili jańǵyrtylatynyn aitty.
"Ony ádil báseke ornatý, jekemenshikti qorǵaý, monopoliiadan aryltý arqyly júzege asyramyz. Osynyń bári elimizdegi saiasi turaqtylyqty nyǵaita túsedi. Sonymen qatar biznestiń múddesi men quqyn qorǵaýǵa yqpal etedi. Eń bastysy sheteldik investorlar úshin ekonomikalyq múmkindikterdi barynsha keńeitedi. Bir sózben aitqanda, aldymyzdan yntymaqtastyqtyń jańa kókjiegi ashylady.
Bul Túrkiianyń iri holdingterine, kompaniialaryna ǵana emes, shaǵyn jáne orta biznes ókilderine de múmkindik beredi", – dedi Qasym-Jomart Toqaev.
