Áleýmettik jelilerde Gorilla Drift Championship týrniriniń negizin qalaýshy ári jetekshisi Artem Chekmenevtiń qazaq tiline qatysty aitqan sózi qyzý talqyǵa tústi. Kóp uzamai Chekmenevtiń ózi de jelide taraǵan videoǵa qatysty pikir bildirdi, dep habarlaidy Dalanews.kz.
Jelide taraǵan videoda Artem Chekmenev qazaqsha sóileýden bas tartady.
"Sen ne men sóileitin tilde sóile, ne menimen múldem sóilespe. Túsinikti me? "Ei" dep áielińe aitasyń. Baýyrym, sen oryssha túsinbeisiń ǵoi", - deidi Chekmenev videoda.
Video áleýmettik jelide tarap, qyzý talqyǵa túsip ketkennen keiin kompaniia ókilderi olardyń áleýmettik jelidegi paraqshalarynda jáne Artem Chekmenovtiń paraqshasynda da pikir jazý múmkindigin alyp tastaǵan.
Chekmenovtiń ózi bul jaitqa qatysty pikir bildirdi. Onyń sózinshe, oqiǵa 2 maýsymda bolǵan. Al video qyrqyp alynǵan jáne onyń tolyq mazmuny múlde basqasha bolypty-mys.
"Sol kúni bolǵan jait týraly myna nárseni aitar em: jarys bolatyn aimaqty tekserip jatqan ýaqytta kúzetshiler bireý kóliktiń bagajynda tegin taýar taratyp jatqanyn baiqaǵan, al bul №3 biýlleten erejesine qars. Biýlleten qujaty 28 sáýirde sportshylardyń tobynda taratylǵan bolatyn. Men oqiǵa ornyna kelip bulai isteýge bolmaitynyn, olardyń áreketi erejege qarsy ekenin, ol uiymdastyrýshylarmen kelisilýi keregin túsindirdim. Al olar bul sharanyń erejesi men reglamentimen tanys bolýy kerek, saldarynan olardyń tarapynan agressiia men provokatsiiaǵa ushyradym.
Artynsha shara bolatyn keshenniń kúzet qyzmeti jigitterden shyǵyp ketýdi surady. Áleýmettik jelide taraǵan "tanymal videoda" alty adam arasyndaǵy jarty saǵattyq áńgimemiz kesip alynǵanyn taǵy da qaitalap aitamyn! Meni jaman tusymnan kórsetý úshin meniń tarapyma jasalǵan provokatsiia sáti kesip alynǵan...", - deidi Chekmenov.
Artem Chekmenov videodaǵy jigittermen uzaq sóileskenin, artynsha emotsiiaǵa berilip sóilep ketkeni úshin keshirim suraǵanyn aitady.
"Nátijesinde bir-birimizdi túsinip, qol alysyp, janjal sol jerde aiaqtaldy dep oiladyq, oǵan kýá adamdar da bar. Bári sol jerde bitti dep oiladyq, biraq olar álgi videony jariialap tastaǵan eken...
Odan bólek, maǵan qoqan-loqy kórsetilip, qaýip tóne bastady. Eń bastysy - men qazaq tili men qazaq halqyna qurmetsizdik tanytqym kelgen joq! Men de Uly qazaq dalasynyń balasymyn, men de óz elimniń patriotymyn",- deidi Artem Chekmenov.
