Prokýror Aijan Aimaǵanova sot otyrysynda Núkenova men Bishimbaevtyń jeke áńgimesin oqyp shyqty, - dep habarlaidy Dalanews.kz.
Hattardan Bishimbaev geolokatsiiaǵa bola ashýlanǵanyn kórýge bolady.
«Men seni kórmeitin bolsam, nesine geolokatsiiańdy qosasyń? Men seni kórmei turmyn» - deidi Bishimbaev.
«Mende 1000 jyldan beri solai tur, úidiń bul jaǵynda Wi-Fi ustamaidy» - dep jazǵan Saltanat.
Sonymen qatar, sotta Bishimbaev Saltanatqa túngi eki jarym men úsh jarym aralyǵynda birneshe ret habarlasqany aityldy. Alaida Saltanat tutqany kótermegen. Bishimbaev túngi ýaqytta habarlasýyn ýaqyt alshaqtyǵy dep túsindirgen. Onyń sózinshe, Saltanat elde bolǵan, al Bishimbaev Túrkiiada bolǵan.
Memlekettik aiyptaýshy Saltanattyń telefonynda saqtap qoiǵan jeke jazbalaryn da oqydy.
«Qýandyq, men Pavlodarǵa ketip bara jatyrmyn. Endi kelmeimin. Bul kúnderi men aramyzda sezim joǵyna kózim jetti. Eshteńeni saqtap qalǵym kelmeidi. Sen tipti kózime shóp salǵanyń úshin tipti keshirim suraǵan da joqsyń. Onyń úshin eshteńe istegiń de kelmedi. Bárine meni kinálap, “psihoterapevtke bar” dep qoimadyń. Soqyrlyǵyń sonsha, onyńdy kótere alar emespin. Keshir meni, umyt, bosat. Bárin sheshtim. Ata-anammen bolam, olar maǵan qaraidy», - dep jazǵan Saltanat telefonynda saqtap qoiǵan jazbasynda.
Sondai-aq Saltanat mundai qarym-qatynastan sharshaǵanyn jazǵan.
«Sálem, janym, osynyń bárine júregim aýyrady. Men seniń osyǵan deiin istegen áreketterińdi baǵalaimyn, biraq men mundai qarym-qatynastan sharshadym. Bul ómir emes. Men seniń oiynshyǵyń da, balań da emespin. Men aýrý emespin. Sondyqtan maǵan 24/7 maǵan ne isteý keregin úiretýdiń qajeti joq. Meniń óz isim bar. Mahabbat pen nekeni saqtaý úshin ózara syilastyq kerek. Biz bir-birimizge tirek bolýymyz qajet, jaý emespiz, jarymester syndy jaýlaspaǵanymyz jón. Ekeýmiz araqatynasymyzdy kóp talqylaǵanymyzben, men budan sharshadym. Saǵan urys-keristi aýyr qabyldaimyn dep aitqan edim. Sonyń kesirininen júikem syr berdi. Endi óz-ózimmen jumys istep, sen úshin ózgerýge tyrysamyn, saǵan unaý úshin bárin isteimin», – degen Saltanat.
