Aqtóbe qalasynyń №55 mektep gimnaziiasynyń bas býhgalteri sottaldy, - dep habarlaidy Dalanews.kz.
Aqtóbe qalasynyń № 2 soty Aqtóbe qalasynyń №55 mektep-gimnaziiasynyń bas býhgalterine qatysty úkim shyǵardy. Aldyn alý sharalary sheńberinde sot protsesi ashyq rejimde júrgizildi.
Sot protsesine onlain rejimde bilim basqarmasy men bólimderiniń qyzmetkerleri, onyń ishinde Aqtóbe oblysynyń 403 qalalyq jáne aýdandyq mekteptiń direktorlary, býhgalterleri, pedagogikalyq quramy qosyldy.
"Aqtóbe qalalyq mektebiniń bas býhgalteri asa iri mólsherde biýdjet qarajatyn jymqyrǵany úshin sottaldy. Ol 8 jyl boiy óziniń banktik shotyna jalaqy retinde zańsyz aýdarymdar jasaǵan, nátijesinde memleketke 413,8 million teńge somasynda zalal keltirildi", - dep jazylǵan Antikor málimetinde.
Tek bir jyldyń ishinde ol ózine 200 million teńgeden asa qarajat aýdarǵan, bul búkil mekteptiń jyldyq eńbekaqy qorynyń 30 paiyzy bolady.
Sot úkimimen oǵan 7 jyl bas bostandyǵynan aiyrý jazasy taǵaiyndaldy, sondai-aq, 10 jyl merzimge jaýapty laýazymdardy atqarý quqyǵynan aiyryldy.
Úkim zańdy kúshine engen joq.
