اقتوبە قالاسىنىڭ №55 مەكتەپ گيمنازياسىنىڭ باس بۋحگالتەرى سوتتالدى، - دەپ حابارلايدى Dalanews.kz.

اقتوبە قالاسىنىڭ № 2 سوتى اقتوبە قالاسىنىڭ №55 مەكتەپ-گيمنازياسىنىڭ باس بۋحگالتەرىنە قاتىستى ۇكىم شىعاردى. الدىن الۋ شارالارى شەڭبەرىندە سوت پروسەسى اشىق رەجيمدە جۇرگىزىلدى.

سوت پروسەسىنە ونلاين رەجيمدە ءبىلىم باسقارماسى مەن بولىمدەرىنىڭ قىزمەتكەرلەرى، ونىڭ ىشىندە اقتوبە وبلىسىنىڭ 403 قالالىق جانە اۋداندىق مەكتەپتىڭ ديرەكتورلارى، بۋحگالتەرلەرى، پەداگوگيكالىق قۇرامى قوسىلدى.

"اقتوبە قالالىق مەكتەبىنىڭ باس بۋحگالتەرى اسا ءىرى مولشەردە بيۋدجەت قاراجاتىن جىمقىرعانى ءۇشىن سوتتالدى. ول 8 جىل بويى ءوزىنىڭ بانكتىك شوتىنا جالاقى رەتىندە زاڭسىز اۋدارىمدار جاساعان، ناتيجەسىندە مەملەكەتكە 413،8 ميلليون تەڭگە سوماسىندا زالال كەلتىرىلدى"، - دەپ جازىلعان انتيكور مالىمەتىندە.

تەك ءبىر جىلدىڭ ىشىندە ول وزىنە 200 ميلليون تەڭگەدەن اسا قاراجات اۋدارعان، بۇل بۇكىل مەكتەپتىڭ جىلدىق ەڭبەكاقى قورىنىڭ 30 پايىزى بولادى.

سوت ۇكىمىمەن وعان 7 جىل باس بوستاندىعىنان ايىرۋ جازاسى تاعايىندالدى، سونداي-اق، 10 جىل مەرزىمگە جاۋاپتى لاۋازىمداردى اتقارۋ قۇقىعىنان ايىرىلدى.

ۇكىم زاڭدى كۇشىنە ەنگەن جوق.