Memleket basshysynyń málimdemesi
Ótken jeksenbide Aqtóbe qalasynda dinniń atyn jamylǵan bir top terrorist eldiń tynyshtyǵyn buzdy. Ol týraly barshańyz bilesizder. Biraq, musylman qaýymy úshin qasietti Ramazan aiy bastalar sátte qandy qylmys jasaǵandardyń aram nietteri iske asqan joq. Quqyq qorǵaý jáne qaýipsizdik qyzmetteriniń qyzmetkerleri úlken qaterdiń betin qaitardy. Terroristerdiń kópshiliginiń kózderi joiyldy, birqatary qolǵa tústi, qalǵandaryn tiisti organdar izdep taýyp, olar zańnyń eń qatań talaptarymen jazaǵa tartylatyn bolady. Qazir halyqtyń alańdaýyna eshbir negiz joq, jaǵdai tolyq baqylaýǵa alyndy.
Men qaitys bolǵandardyń otbasylaryna, týys-týǵandaryna shyn júregimmen kóńil aitamyn. Qaza tapqan áskeri qyzmetkerler otan aldyndaǵy antyna adal bolyp, el qaýipsizdigi jolynda óshpes erlik kórsetti. Olardyń erlikteri memleket tarapynan laiyqty baǵalanatyn bolady. Onyń ústine 4 azamat qaitys boldy, bári Aqtóbeniń turǵyndary. Sondyqtan, men erteńgi beisenbi, 9 maýsym kúnin Jalpyulttyq aza tutý kúni dep jariialaimyn. Qaza bolǵandardyń artynda otbasy, bala-shaǵalary qaldy. Meniń tapsyrmam boiynsha, olarǵa barlyq qajetti kómekter jasalýda.
Táýelsizdikti jariialaý bar, al ony qorǵap, nyǵaitý jáne damytý odan da jaýapty is. El birligi, ishki tynyshtyq sol úshin kerek. Men muny ylǵi aityp kelemin. El ishine búlik salýdyń, «tústi revoliýtsiialardyń» talaiyn basqa elderden kórip, bilip otyrmyz. Ol lańkestik áreketterden, kóshege shyǵyp shýlaýdan bastalady. Odan konstitýtsiiaǵa qarsy shyǵady da, aiaǵynda memleket kúirep, halyq ash-jalańash qalady. Munyń bárin biz kórip, bilip, baiqap otyrmyz.
Birinshiden, biz kez-kelgen sipattaǵy ekstremizm men terrorizmge qarsy zańdardy qaita qarap, bul qubylysqa qatań toitarys berý jaiyn oilastyrýymyz kerek. Qolyna qarý alyp, kisi óltirgen adam ólim jazasyna kesilýi qajet. Ekinshiden, eldigimizge syna qaǵatyn zulymdyqtardyń ymyrasyz jolyn kesýimiz qajet. El tynyshtyǵyn saqtamasaq mynadai álemdik daǵdarystan óte almaimyz. Sondyqtan barsha halyq bolyp birigip, eldi saqtaýdy oilaýymyz kerek.
Qymbatty qazaqstandyqtar!
El ishi bútin bolmasa, el de bolmaidy. Qazir – naǵyz elim, jerim degen otansúigishtikti kórsetetin ýaqyt. Halqymyzdyń qaýipsizdigi men tutastyǵy úshin bárine de daiyn ekenimizdi kórsetetin kez keldi. Qaýipsizdik pen turaqtylyq, beibitshilik pen kelisim – eń basty bailyǵymyz. Biz táýelsizdigimizdiń tiregi bolǵan bul qundylyqtardy kózdiń qarashyǵyndai saqtaimyz.
Men Qazaqstan halqy dúniedegi daǵdarys jáne búgingidei jaýapty shaqta taǵy da barsha álemge eldigi men birligin pash eterine senemin. Elimiz aman, jurtymyz tynysh bolsyn!
Derekkózi: akorda.kz
