Úkimettiń keńeitilgen keńesinde Prezident asa ózekti máselege airyqsha toqtaldy.
“Elimizdiń barlyq azamatyna birdei jaǵdai jasap, shyn máninde kómekke muqtaj adamdarǵa járdem berý – áleýmettik memlekettiń basty mindeti.
Qazir memleket biýdjetiniń jartysynan kóbi áleýmettik salaǵa bólinip jatyr.
Sońǵy jyldary áleýmettik saladaǵy infraqurylymdy damytý úshin biraz jumys atqaryldy. Áleýmettik sala mamandarynyń, ásirese pedagogter men meditsina qyzmetkerleriniń bedelin arttyrýǵa basa mán berildi. Endi azamattarǵa kórsetiletin qyzmettiń sapasyn jaqsartý qajet. Bul – eń aldymen, densaýlyq saqtaý salasyna qatysty másele.
Halyqtyń densaýlyǵy – eń mańyzdy másele. “Birinshi bailyq – densaýlyq” dep halqymyz tekke aitpaǵan. Osy turǵydan alǵanda salany jedel jaqsartý qajet ekendigin el-jurt kórip te, bilip te otyr.
Memleket basshysy “Mindetti áleýmettik meditsinalyq saqtandyrý júiesiniń iske qosylǵanyna bes jyl boldy. Sodan beri bul salanyń biýdjeti 2 ese artty. Biyl 2,6 trillion teńge bólinedi.
Alaida, meditsinalyq kómektiń sapasy aitarlyqtai jaqsardy dep aitýǵa bolmaidy. Kóptegen qyzmet áli de qoljetimdi emes”, – dep oryndy syn aitty.
Sonymen qatar kóp jaǵdaida resýrstar tiimsiz jumsalatynyn, sonyń saldarynan bul salaǵa qosymsha qarjy bólip, biýdjetke salmaq salýǵa týra keletinin atap ótti. “Úkimet meditsinalyq saqtandyrý júiesiniń qyzmetin qatań baqylaýǵa alýy kerek. Bul júie qarapaiym ári túsinikti bolýǵa tiis», – dedi Prezident.
Memleket basshysy ómirdegi eń ózekti máselelerdi atap, árqaisysyna qatysty óz usynysy men paiymyn ortaǵa saldy.
