ۇكىمەتتىڭ كەڭەيتىلگەن كەڭەسىندە پرەزيدەنت اسا وزەكتى ماسەلەگە ايرىقشا توقتالدى.
“ەلىمىزدىڭ بارلىق ازاماتىنا بىردەي جاعداي جاساپ، شىن مانىندە كومەككە مۇقتاج ادامدارعا جاردەم بەرۋ – الەۋمەتتىك مەملەكەتتىڭ باستى مىندەتى.
ءقازىر مەملەكەت بيۋدجەتىنىڭ جارتىسىنان كوبى الەۋمەتتىك سالاعا ءبولىنىپ جاتىر.
سوڭعى جىلدارى الەۋمەتتىك سالاداعى ينفراقۇرىلىمدى دامىتۋ ءۇشىن ءبىراز جۇمىس اتقارىلدى. الەۋمەتتىك سالا ماماندارىنىڭ، اسىرەسە پەداگوگتەر مەن مەديسينا قىزمەتكەرلەرىنىڭ بەدەلىن ارتتىرۋعا باسا ءمان بەرىلدى. ەندى ازاماتتارعا كورسەتىلەتىن قىزمەتتىڭ ساپاسىن جاقسارتۋ قاجەت. بۇل – ەڭ الدىمەن، دەنساۋلىق ساقتاۋ سالاسىنا قاتىستى ماسەلە.
حالىقتىڭ دەنساۋلىعى – ەڭ ماڭىزدى ماسەلە. “ءبىرىنشى بايلىق – دەنساۋلىق” دەپ حالقىمىز تەككە ايتپاعان. وسى تۇرعىدان العاندا سالانى جەدەل جاقسارتۋ قاجەت ەكەندىگىن ەل-جۇرت كورىپ تە، ءبىلىپ تە وتىر.
مەملەكەت باسشىسى “مىندەتتى الەۋمەتتىك مەديسينالىق ساقتاندىرۋ جۇيەسىنىڭ ىسكە قوسىلعانىنا بەس جىل بولدى. سودان بەرى بۇل سالانىڭ بيۋدجەتى 2 ەسە ارتتى. بيىل 2،6 تريلليون تەڭگە بولىنەدى.
الايدا، مەديسينالىق كومەكتىڭ ساپاسى ايتارلىقتاي جاقساردى دەپ ايتۋعا بولمايدى. كوپتەگەن قىزمەت ءالى دە قولجەتىمدى ەمەس”، – دەپ ورىندى سىن ايتتى.
سونىمەن قاتار كوپ جاعدايدا رەسۋرستار ءتيىمسىز جۇمسالاتىنىن، سونىڭ سالدارىنان بۇل سالاعا قوسىمشا قارجى ءبولىپ، بيۋدجەتكە سالماق سالۋعا تۋرا كەلەتىنىن اتاپ ءوتتى. “ۇكىمەت مەديسينالىق ساقتاندىرۋ جۇيەسىنىڭ قىزمەتىن قاتاڭ باقىلاۋعا الۋى كەرەك. بۇل جۇيە قاراپايىم ءارى تۇسىنىكتى بولۋعا ءتيىس»، – دەدى پرەزيدەنت.
مەملەكەت باسشىسى ومىردەگى ەڭ وزەكتى ماسەلەلەردى اتاپ، ءارقايسىسىنا قاتىستى ءوز ۇسىنىسى مەن پايىمىن ورتاعا سالدى.
