Prezıdent UAE SWAT Challenge saıysynda top jarǵan kúshtik qurylymdardyń bir top ofıserin marapattaý rásiminde sóz sóıledi, dep habarlaıdy Dalanews.kz.
Bıyl Dýbaıda ótken dúbirli dodaǵa Qazaqstan atynan 12 komanda qatysqan. İshki ister mınıstrliginiń "Suńqar" jáne "Tomırıs" komandalary halyqaralyq jarystyń kúmis júldegeri atandy. Al Ulttyq qaýipsizdik komıtetiniń "Arystan" komandasy tórtinshi orynǵa ıe boldy. Memlekettik kúzet qyzmeti men Qorǵanys mınıstrliginiń komandalary da sheberliktiń úzdik úlgisin kórsetti.
Memleket basshysy jeńimpazdardy quttyqtap, bul tabys tıanaqty daıyndyq pen qajyrly eńbektiń nátıjesi ekenin atap ótti.
“Eldiń atyn er shyǵarar" degen. Saıypqyran sarbazdarymyz kók týymyzdy asqaq jelbiretti. Tórtkúl dúnıe jaýyngerlerimizdiń myqtylyǵyna kýá boldy. Biz sizderdi maqtan tutamyz. Osyndaı jeńisti sátter barsha halqymyzdyń, ásirese, óskeleń urpaqtyń rýhyn kóteredi. El qorǵany myqty bolsa, Qazaqstannyń eńsesi árdaıym bıik bolmaq”, – dedi Qasym-Jomart Toqaev.
Memleket basshysy halqymyzdyń erlik dástúri tereńde jatqanyna nazar aýdardy.
“Bıyl Uly Jeńistiń 80 jyldyǵyn atap ótemiz. Bul – bostandyq pen ádildik uǵymdaryn tý etip, maıdanda janqıarlyqpen shaıqasqan, tylda eńbek etken barsha qazaqstandyqtarǵa kórsetilgen qurmet. Batyrlarymyzdyń teńdessiz erligin urpaq jadynda saqtaý – paryzymyz. Búginde sizder jaýynger halyqtyń urpaǵy retinde Otan aldyndaǵy qasıetti paryzdy tereń túsinip, adal qyzmet etip júrsizder. Bárińiz de elimizdegi beıbit ómirdi saqtaý úshin tabandy eńbek etip kelesizder. Sizderdi zań men tártip saqshysy deýge tolyq negiz bar. Zań men tártip – ádiletti ári qaýipsiz memlekettiń ózegi”, – dedi Prezıdent.
Sonymen qatar Qasym-Jomart Toqaev el tynyshtyǵyn kúzetken arnaýly qyzmetter men kúshtik qurylymdardyń atqarǵan isterine toqtaldy.
“Byltyr Ulttyq qaýipsizdik komıteti zańsyz áreketterdiń aldyn alý úshin jıyrmadan astam jedel jaýyngerlik is-shara ótkizdi. Eki terrorlyq aktiniń jolyn kesip, qaskóılerge tosqaýyl qoıdy. Ulttyq ulan jasaqtary tótenshe jaǵdaılardyń saldaryn joıýǵa belsene atsalysty. İshki ister mınıstrliginiń qurylymdary aýqymdy jumys atqaryp jatyr. Ótken jyly esirtki óndiretin 64 oryn jabyldy. 22 myń tonna esirtki tárkilendi. Esirtkini jarnamalaǵan 7,5 myń saıt buǵattaldy. Eki mıllıard teńgeden astam qarjyny shetelge shyǵarmaq bolǵan alaıaqtardyń joly kesildi. Sońǵy úsh jylda 8 myńǵa jýyq túrli qarý-jaraq tabyldy. Mundaı mysaldar óte kóp. Arnaýly qyzmet qataryndaǵy myńdaǵan sarbaz memlekettiń egemendigi men azamattardyń qaýipsizdigin qorǵap júr. Jaýyngerlerimiz qashanda Otan aldyndaǵy antyna adal”, – dedi Memleket basshysy.
Prezıdent qazir keıbir memleketter, tipti alpaýyt elder syrtqy jáne ishki saıasatyndaǵy ustanymdaryn qaıta qarap jatqanyn mysalǵa alyp, Qazaqstan dástúrli ári zamanaýı qundylyqtardy teń ustaıtyn pragmatızmge áldeqashan bet burǵanyn jetkizdi.
“Zań men tártip ústemdigin ornatý mańyzdy ekenin árdaıym aıtyp júrmiz. Ýaqyt bizdiń ustanymdarymyz ben strategıalyq baǵdarymyzdyń durys ekenin kórsetti. Sondyqtan biz aldaǵy ýaqytta da ulttyq múddemizdi qorǵap, elimizge laıyqty biregeı jolmen júremiz. Jalpyulttyq qundylyqtarymyzdy dáripteımiz. Eshkimge jaltaqtamaı, óz saıasatymyzdy júrgizemiz. Óıtkeni bizdiń maqsatymyz – aıqyn. Bul – qýatty jáne órkendegen Qazaqstandy qurý”, – dedi Qasym-Jomart Toqaev.
Prezıdent sózin qorytyndylaı kele, ofıserlerdiń qyzmetine sáttilik tiledi jáne olardy memlekettik nagradalarmen marapattady.
Jıynda QR İshki ister mınıstrliginiń “Suńqar” komandasynyń múshesi, polısıa aǵa leıtenanty Ermekqalı Shoqaev, İshki ister mınıstrligi “Tomırıs” komandasynyń kapıtany, polısıa maıory Aınagúl Baıjigitova jáne QR Memlekettik kúzet qyzmetiniń kapıtany, “Sardar A” komandasynyń múshesi Merlan Ultanbaev sóz sóıledi.
