Qasym-Jomart Toqaevtyń Qostanai oblysyna jumys sapary “KamLitKZ”jaýapkershiligi shekteýli seriktestiginiń shoiyn quiý zaýytymen tanysýdan bastaldy. Atalǵan kásiporyn óńirdiń indýstriialyq aimaǵynda ornalasqan, dep habarlaidy Dalanews.kz.
Prezident júk kólikterine arnalǵan qosalqy bólshekter shyǵaratyn óndiris ornyn aralap kórdi. Seriktestiktiń bas direktory Dmitrii Gýrtovoi zaýytta jylyna 45 myń tonna shoiyn quimasy óndiriletinin aitty. Quny 78,2 milliard teńge bolatyn jobany iske asyrý nátijesinde 500 jumys orny ashyldy.
Memleket basshysyna jobaǵa Qazaqstannyń injenerleri men tehnologtary atsalysyp jatqany baiandaldy. Sonymen qatar álemdik deńgeidegi tájiribeli injiniring kompaniialarynyń sarapshylary men eýropalyq mashina jasaýshylar tartylǵan.
Qasym-Jomart Toqaevqa shoiyn qorytý jáne qalypqa quiý, sondai-aq buiymdy óńdeý sekildi jumystardyń tolyq protsesi kórsetildi.
Zaýyt barlyq zamanaýi talapqa sai keledi. Avtomattandyrý jáne energiialyq tiimdilik deńgeii joǵary bolǵandyqtan, qorshaǵan ortaǵa áseri az. Qazirgi ýaqytta munda 30 robot bar. Olar anaǵurlym kúrdeli ári aýyr tehnologiialyq operatsiialardy oryndaidy.
Budan soń zaýytta eńbek etetin otandyq jas injenerlermen áńgimelesti.
“Búginde biz jumysshy mamandardy qoldap jatyrmyz. Ol jóninde Joldaýymda da aittym. Kelesi jyldy Jumysshy mamandyqtary jyly dep jariialadyq. Eńbek – qashan da qundy. Bul jerde kil jastar jumys isteidi eken. Biz iri jáne shaǵyn kásiporyndarda qyzmet etetin mamandardy, ásirese jastardy mindetti túrde qoldaimyz. Elimizde eńbek ótili 100, 200 jyldy quraityn, tipti odan da asatyn jumysshylar áýleti bar. Sondyqtan biz osyndai otbasylarǵa, áýletterge qurmet kórsetemiz. Sizder sekildi jastardyń ómir joly endi bastalyp jatyr. Elimizdiń damýyna zor úles qosatyndaryńyzǵa senimdimin. Barshańyzǵa sáttilik tileimin”, – dedi Qasym-Jomart Toqaev.
Prezident jańa óndirilgen tsilindrlar blogyna qoltańba qaldyryp, joba qatysýshylaryna Qazaqstannyń mashina jasaý klasterin damytýǵa úles qosqany úshin alǵys aitty.
Sonymen qatar Memleket basshysyna Qostanai oblysynyń ákimi Qumar Aqsaqalov óńirge investitsiia tartý jóninde málimet berdi. Atap aitqanda, indýstriialyq sektordaǵy, agroónerkásip keshenindegi, metallýrgiia, mashina jasaý jáne logistika salalaryndaǵy jańa jobalar týraly baiandady.
Qumar Aqsaqalovtyń aitýynsha, jospar iske asyrylǵan kezde, jalpy óńirlik ónim kólemi 2 ese ósip, jyl saiynǵy biýdjet túsimi 75 milliard teńgege ulǵaiady. Sondai-aq ortasha jalaqy mólsheri 1,5 ese artyp, 20 myńǵa jýyq jańa jumys orny ashylady.
