قاسىم-جومارت توقايەۆتىڭ قوستاناي وبلىسىنا جۇمىس ساپارى “KamLitKZ”جاۋاپكەرشىلىگى شەكتەۋلى سەرىكتەستىگىنىڭ شويىن قۇيۋ زاۋىتىمەن تانىسۋدان باستالدى. اتالعان كاسىپورىن ءوڭىردىڭ يندۋستريالىق ايماعىندا ورنالاسقان، دەپ حابارلايدى Dalanews.kz.
پرەزيدەنت جۇك كولىكتەرىنە ارنالعان قوسالقى بولشەكتەر شىعاراتىن ءوندىرىس ورنىن ارالاپ كوردى. سەرىكتەستىكتىڭ باس ديرەكتورى دميتريي گۋرتوۆوي زاۋىتتا جىلىنا 45 مىڭ توننا شويىن قۇيماسى وندىرىلەتىنىن ايتتى. قۇنى 78،2 ميلليارد تەڭگە بولاتىن جوبانى ىسكە اسىرۋ ناتيجەسىندە 500 جۇمىس ورنى اشىلدى.
مەملەكەت باسشىسىنا جوباعا قازاقستاننىڭ ينجەنەرلەرى مەن تەحنولوگتارى اتسالىسىپ جاتقانى باياندالدى. سونىمەن قاتار الەمدىك دەڭگەيدەگى تاجىريبەلى ينجينيرينگ كومپانيالارىنىڭ ساراپشىلارى مەن ەۋروپالىق ماشينا جاساۋشىلار تارتىلعان.
قاسىم-جومارت توقايەۆقا شويىن قورىتۋ جانە قالىپقا قۇيۋ، سونداي-اق بۇيىمدى وڭدەۋ سەكىلدى جۇمىستاردىڭ تولىق پروسەسى كورسەتىلدى.
زاۋىت بارلىق زاماناۋي تالاپقا ساي كەلەدى. اۆتوماتتاندىرۋ جانە ەنەرگيالىق تيىمدىلىك دەڭگەيى جوعارى بولعاندىقتان، قورشاعان ورتاعا اسەرى از. قازىرگى ۋاقىتتا مۇندا 30 روبوت بار. ولار اناعۇرلىم كۇردەلى ءارى اۋىر تەحنولوگيالىق وپەراسيالاردى ورىندايدى.
بۇدان سوڭ زاۋىتتا ەڭبەك ەتەتىن وتاندىق جاس ينجەنەرلەرمەن اڭگىمەلەستى.
“بۇگىندە ءبىز جۇمىسشى مامانداردى قولداپ جاتىرمىز. ول جونىندە جولداۋىمدا دا ايتتىم. كەلەسى جىلدى جۇمىسشى ماماندىقتارى جىلى دەپ جاريالادىق. ەڭبەك – قاشان دا قۇندى. بۇل جەردە كىل جاستار جۇمىس ىستەيدى ەكەن. ءبىز ءىرى جانە شاعىن كاسىپورىنداردا قىزمەت ەتەتىن مامانداردى، اسىرەسە جاستاردى مىندەتتى تۇردە قولدايمىز. ەلىمىزدە ەڭبەك ءوتىلى 100، 200 جىلدى قۇرايتىن، ءتىپتى ودان دا اساتىن جۇمىسشىلار اۋلەتى بار. سوندىقتان ءبىز وسىنداي وتباسىلارعا، اۋلەتتەرگە قۇرمەت كورسەتەمىز. سىزدەر سەكىلدى جاستاردىڭ ءومىر جولى ەندى باستالىپ جاتىر. ەلىمىزدىڭ دامۋىنا زور ۇلەس قوساتىندارىڭىزعا سەنىمدىمىن. بارشاڭىزعا ساتتىلىك تىلەيمىن”، – دەدى قاسىم-جومارت توقايەۆ.
پرەزيدەنت جاڭا وندىرىلگەن سيليندرلار بلوگىنا قولتاڭبا قالدىرىپ، جوبا قاتىسۋشىلارىنا قازاقستاننىڭ ماشينا جاساۋ كلاستەرىن دامىتۋعا ۇلەس قوسقانى ءۇشىن العىس ايتتى.
سونىمەن قاتار مەملەكەت باسشىسىنا قوستاناي وبلىسىنىڭ اكىمى قۇمار اقساقالوۆ وڭىرگە ينۆەستيسيا تارتۋ جونىندە مالىمەت بەردى. اتاپ ايتقاندا، يندۋستريالىق سەكتورداعى، اگروونەركاسىپ كەشەنىندەگى، مەتاللۋرگيا، ماشينا جاساۋ جانە لوگيستيكا سالالارىنداعى جاڭا جوبالار تۋرالى باياندادى.
قۇمار اقساقالوۆتىڭ ايتۋىنشا، جوسپار ىسكە اسىرىلعان كەزدە، جالپى وڭىرلىك ءونىم كولەمى 2 ەسە ءوسىپ، جىل سايىنعى بيۋدجەت ءتۇسىمى 75 ميلليارد تەڭگەگە ۇلعايادى. سونداي-اق ورتاشا جالاقى مولشەرى 1،5 ەسە ارتىپ، 20 مىڭعا جۋىق جاڭا جۇمىس ورنى اشىلادى.
