Qasym-Jomart Toqaev saltanatty is-sharada qazaqstandyqtar Nikol Pashiniandy Armeniianyń damýyna jańa lep ákelgen, memlekettik qurylymnyń barlyq salada qaita jańǵyrýyna tyń serpin bergen jalpyulttyq kóshbasshy dep biletinin jetkizdi dep habarlaidy Dalanews.kz.
– Sizdiń kóregen basshylyǵyńyzdyń arqasynda Armeniia ornyqty damý jolyna túsip, halyqaralyq arenadaǵy pozitsiiasyn nyǵaitty. Sondai-aq ishki jáne syrtqy saiasatta parasatty, jaýapty ustanymymen úlgi kórsetip otyr. Siz óte kúrdeli geosaiasi ahýalda qalyptan tys ári batyl sheshim qabyldadyńyz. Túptiń túbinde bul armian halqyna paidasyn tigizetin óte qundy sheshim boldy. Dostas, baýyrlas Armeniia beibitshilik, ornyqty damý jolyn tańdaǵany anyq. Bul iste Sizdiń tarihi eńbegińiz zor. Vashingtonda qabyldanǵan Armeniia men Ázerbaijan arasyndaǵy beibit kelisimdi ilgeriletýde eleýli ról atqarǵanyńyzdy atap ótkim keledi, – dedi Qazaqstan Prezidenti.
Qasym-Jomart Toqaev búginde qazaq-armian memleketaralyq bailanysy strategiialyq seriktestiktiń jańa deńgeiine kóterilgenin málimdedi.
– Bul iske Sizdiń elderimiz arasyndaǵy san qyrly yntymaqtastyqty damytýǵa belsendi atsalysýyńyz aitarlyqtai yqpal etti. Qazaq-armian qarym-qatynasyn damytýdaǵy úlken úlesińiz ben airyqsha eńbegińizdi eskere otyryp, búgin Sizdi Qazaqstan Respýblikasynyń eń joǵary memlekettik nagradasy – «Altyn Qyran» ordenimen marapattaý týraly sheshim qabyldadym. Bul – myzǵymas baýyrlastyǵymyzdyń, ózara berik senimniń jáne halyqtarymyzdyń keleshegi jolyndaǵy ortaq umtylystarymyzdyń jarqyn simvoly, – dedi Prezident.
Nikol Pashinian Qazaqstannyń eń joǵary nagradasymen marapattaǵany úshin Qasym-Jomart Toqaevqa jáne barsha qazaq halqyna alǵys aityp, muny otandastaryna kórsetilgen erekshe qurmettiń belgisi retinde qabyldaitynyn jetkizdi.
– Men úshin baýyrlas Qazaqstan Respýblikasynyń eń joǵary nagradasyna ie bolý jáne ony Sizdiń qolyńyzdan alý – zor mártebe. Sizdi óte tájiribeli saiasatker, memleket qairatkeri, diplomat retinde bilemiz. Sondyqtan Sizdiń bergen baǵańyz men úshin qundy. Bul marapat ekijaqty qarym-qatynasymyzdy ǵana emes, tutas óńirdiń damýyna septigin tigizedi dep senemin, – dedi Armeniia Premer-ministri.
