Qazaqstan mektepterinde oqýshylardyń bilimin baǵalaý júiesi ózgerýi múmkin. Qazir Oqý-aǵartý ministrligi BJB jáne TJB júiesine taldaý júrgizip jatyr, dep habarlaidy dalanews.kz.
Oqý-aǵartý ministri Juldyz Súleimenovanyń aitýynsha, vedomstvo qoldanystaǵy baǵalaý tásilderin kezeń-kezeńimen qaita qaraýdy josparlap otyr.
Qazirgi tańda Orta bilim komiteti barlyq synyp boiynsha beriletin tapsyrmalar men oqýshylardyń jaýaptaryna saraptama jasaýda. Bul jumys BJB men TJB-nyń oqýshynyń bilim deńgeiine, muǵalimniń júktemesine jáne jalpy oqý protsesine qalai áser etip otyrǵanyn anyqtaý úshin júrgizilip jatyr.
Ministrdiń sózinshe, kriterialdy baǵalaý júiesi bilim berý standartyna engizilgen. Osyǵan bailanysty dástúrli jazba jumystaryn qaita qarastyryp, olardy oqý protsesinde keńirek qoldanýǵa múmkindik bar.
Atap aitqanda, mektepterde diktant, mazmundama, shyǵarma jáne baqylaý jumystary siiaqty burynnan qalyptasqan baǵalaý túrlerin qaita engizý máselesi talqylanýda.
"Birtindep BJB men TJB-dan alystaimyz dep oilaimyz. Biraq ol úshin naqty negiz ben jan-jaqty saraptama qajet", – dedi Juldyz Súleimenova.
Ministrlik bul ózgeristerdi birden engizýdi kózdep otyrǵan joq. Aldymen qoldanystaǵy júieniń tiimdiligi jan-jaqty zerttelmek. Sebebi BJB men TJB birneshe jyldan beri mektep tájiribesinde qoldanylyp keledi, al ony ózgertý muǵalimderdiń jumysyna da, oqýshylardyń oqý protsesine de tikelei áser etedi.
