Petropavldaǵy Abai atyndaǵy mamandandyrylǵan qazaq mektep-gimnaziiasynda jóndeý jumystary kezinde eki tehqyzmetker qurylys satylarynan qulap, aýyr jaraqat aldy, dep habarlaidy dalanews.kz.
Oqiǵa mekteptiń sport zalynda jóndeý jumystary kezinde bolǵan. Aldyn ala málimet boiynsha, áielder tóbeni syrlap jatqan sátte shamamen bes metr biiktikten qulaǵan.
Saldarynan 54 jastaǵy qyzmetker bas-mi jaraqatyn, aiaqtarynyń birneshe jerden synýyn jáne ashyq synyq alǵan. Oǵan ota jasalyp, qazirgi jaǵdaiy turaqty dep baǵalanýda.
Al 57 jastaǵy ekinshi áieldiń keýde jáne bel omyrtqalary kompressiialyq synǵan. Ol travmatologiia bóliminde em qabyldap jatyr jáne oǵan da operatsiia qajet.
Oqiǵa qoǵamda qyzý talqylanyp, zardap shekkenderdiń týystary mektep ákimshiligin synǵa aldy. Zardap shekken qyzmetkerdiń jieni Janna Qaparova áleýmettik jelide tehqyzmetkerlerdi laýazymdyq mindetine kirmeitin biiktegi jumystardy oryndaýǵa májbúrlegenin málimdedi. Onyń aitýynsha, buǵan mekteptiń sharýashylyq meńgerýshisi qysym kórsetip, jumystan shyǵaramyz dep qorqytqan.
Soltústik Qazaqstan oblysy politsiia departamenti eńbek qaýipsizdigi talaptaryn buzý deregi boiynsha sotqa deiingi tergeý bastalǵanyn habarlady.
Qazir tergeý barysynda áielderdiń ne sebepti qaýipsizdik beldiginsiz jáne tiisti biliktiliksiz biiktikte jumys istegeni anyqtalmaq.
