Qazaqstan mektepterinde oqýshylardyń syrtqy kelbetine qoiylatyn talaptar qaita talqylanyp jatyr, dep habarlaidy dalanews.kz.
Áleýmettik jelide taraǵan videoda mektep ókili oqýshylardyń sabaqqa mekteptiń ishki tártibi men bekitilgen talaptarǵa sai kelbetimen kelýi kerektigin aitqan. Videoda shash úlgisi, áshekei buiymdar, tyrnaq jáne oqýshy qyzdardyń syrtqy kelbetine qatysty shekteýler týraly sóz bolady.
Alaida Qazaqstan boiynsha oqýshylarǵa shash ósirýge, tyrnaq boiaýǵa nemese syrǵa taǵýǵa tikelei tyiym salatyn jańa jalpyulttyq ereje engizildi degen aqparat ázirge resmi qujattardan rastalmaidy.
Qoldanystaǵy talaptarǵa sáikes, mektep formasy klassikalyq stilde jáne biryńǵai tús úilesiminde bolýy tiis. Forma kúndelikti, merekelik jáne sporttyq bolyp bólinedi.
Sonymen qatar mekteptiń ishki tártibi men syrtqy kelbetke qatysty qosymsha talaptar bilim berý uiymynyń jarǵysy men ishki erejelerinde belgilenýi múmkin. Mysaly, Astanadaǵy №80 mektep-gimnaziiasy 2026–2027 oqý jylyna arnalǵan erejesinde oqýshylardyń uqypty kelbet ustanýy, shashynyń jinaqy bolýy jáne shamadan tys áshekeiler men aksessýarlardy paidalanbaýy kerektigin kórsetken.
Mektep formasyna qatysty negizgi talaptar Bilim ministriniń 2016 jylǵy №26 buiryǵymen retteledi. Qujattyń qoldanystaǵy redaktsiiasynda ata-analar balasynyń ózi oqityn mektepte belgilengen formany kiiýin qamtamasyz etýge mindetti ekeni kórsetilgen.
Mektep formasynyń úlgisi men keibir naqty talaptary ata-analar, mekteptiń ózin-ózi basqarýy jáne qamqorshylyq keńesimen talqylanyp, jalpy mekteptik ata-analar jinalysynyń hattamasymen bekitiledi.
Al áleýmettik jelide aitylǵandai, syrtqy kelbet talaptaryn oryndamaǵan oqýshynyń ata-anasyna birden aiyppul salý máselesine kelsek, mundai jaza mektep formasyna qoiylatyn talaptardy buzǵany úshin avtomatty túrde qoldanylatyn jalpy ereje retinde kórsetilmegen. Sondyqtan naqty jaǵdaida mekteptiń ishki tártibi men qoldanystaǵy zań talaptaryn bólek qaraý qajet.
Osylaisha, áleýmettik jelide taraǵan aqparattaǵy «biyldan bastap oqýshylar qalaǵanynsha syrtqy kelbetimen erekshelene almaidy» degen tujyrymdy jalpy Qazaqstandaǵy barlyq mektepke qatysty jańa zań retinde qabyldaýǵa ázirge negiz joq. Resmi talaptar eń aldymen mektep formasy men bilim berý uiymynyń ishki tártibin saqtaýǵa baǵyttalǵan.
