Қазақстан мектептерінде оқушылардың сыртқы келбетіне қойылатын талаптар қайта талқыланып жатыр, деп хабарлайды dalanews.kz.
Әлеуметтік желіде тараған видеода мектеп өкілі оқушылардың сабаққа мектептің ішкі тәртібі мен бекітілген талаптарға сай келбетімен келуі керектігін айтқан. Видеода шаш үлгісі, әшекей бұйымдар, тырнақ және оқушы қыздардың сыртқы келбетіне қатысты шектеулер туралы сөз болады.
Алайда Қазақстан бойынша оқушыларға шаш өсіруге, тырнақ бояуға немесе сырға тағуға тікелей тыйым салатын жаңа жалпыұлттық ереже енгізілді деген ақпарат әзірге ресми құжаттардан расталмайды.
Қолданыстағы талаптарға сәйкес, мектеп формасы классикалық стильде және бірыңғай түс үйлесімінде болуы тиіс. Форма күнделікті, мерекелік және спорттық болып бөлінеді.
Сонымен қатар мектептің ішкі тәртібі мен сыртқы келбетке қатысты қосымша талаптар білім беру ұйымының жарғысы мен ішкі ережелерінде белгіленуі мүмкін. Мысалы, Астанадағы №80 мектеп-гимназиясы 2026–2027 оқу жылына арналған ережесінде оқушылардың ұқыпты келбет ұстануы, шашының жинақы болуы және шамадан тыс әшекейлер мен аксессуарларды пайдаланбауы керектігін көрсеткен.
Мектеп формасына қатысты негізгі талаптар Білім министрінің 2016 жылғы №26 бұйрығымен реттеледі. Құжаттың қолданыстағы редакциясында ата-аналар баласының өзі оқитын мектепте белгіленген форманы киюін қамтамасыз етуге міндетті екені көрсетілген.
Мектеп формасының үлгісі мен кейбір нақты талаптары ата-аналар, мектептің өзін-өзі басқаруы және қамқоршылық кеңесімен талқыланып, жалпы мектептік ата-аналар жиналысының хаттамасымен бекітіледі.
Ал әлеуметтік желіде айтылғандай, сыртқы келбет талаптарын орындамаған оқушының ата-анасына бірден айыппұл салу мәселесіне келсек, мұндай жаза мектеп формасына қойылатын талаптарды бұзғаны үшін автоматты түрде қолданылатын жалпы ереже ретінде көрсетілмеген. Сондықтан нақты жағдайда мектептің ішкі тәртібі мен қолданыстағы заң талаптарын бөлек қарау қажет.
Осылайша, әлеуметтік желіде тараған ақпараттағы «биылдан бастап оқушылар қалағанынша сыртқы келбетімен ерекшелене алмайды» деген тұжырымды жалпы Қазақстандағы барлық мектепке қатысты жаңа заң ретінде қабылдауға әзірге негіз жоқ. Ресми талаптар ең алдымен мектеп формасы мен білім беру ұйымының ішкі тәртібін сақтауға бағытталған.
