Respýblikalyq ǵylymi-praktikalyq ortalyq qazaqstandyq ustazdardy oqýlyqtarǵa saraptama jasaýǵa qatysýǵa shaqyrdy. Bul týraly Oqý-aǵartý ministrliginiń baspasóz qyzmeti málimdedi, dep habarlaidy Dalanews.kz.
Barlyq rásim E-expert.gov.kz onlain-platformasynda ótedi. Júie qujattardy qabyldaý men testileýden bastap, esse jazý, modýldik oqýdan ótý jáne finaldyq sertifikatqa deiingi qadamdardy tolyq avtomattandyrǵan. Osylaisha, irikteý barynsha ashyq ári yńǵaily boldy.
Búginde ortalyq bazasynda jańa formattaǵy 400-den astam sarapshy tirkelgen. Olar konkýrs kezeńderinen sátti ótip, arnaiy daiyndyqtan ótken.
Uiymdastyrýshylar elimizdiń túkpir-túkpirindegi pedagogtardy kásibi qaýymdastyqtyń bir bóligi bolýǵa jáne Qazaqstandaǵy orta bilim sapasyn jaqsartýǵa úles qosýǵa shaqyrady.
