Aqtóbede mektep dırektory tekserý komısıasynyń qyzmetkerlerine shaǵymdandy. Nómiri 60-shy orta mektepti tekserýge kelgender ádepsizdik tanytty dep aıyptaıdy. Kabınette bolǵan jaǵdaıdy taspaǵa jazyp alyp, áleýmettik jelige júktepti, dep habarlaıdy Dalanews.kz Astana telearnasyna silteme jasap.

Beınejazbadaǵy bul adamdar mektepti tekserýge kelgen memlekettik qyzmetker. Olar 8 qańtar kúni bastalǵan tekserý jumystarynyń sáýir aıyna deıin sozylatyndyǵyn eskertýge kelgen. Biraq mektep dırektory tekserýshiler Zańǵa saı negizdeme bermegenin aıtady. Onymen qoımaı memlekettik qyzmetkerge jat qylyqtar tanytty dep otyr.

Abzal Tájimishov, Aqtóbe qalasyndaǵy №60 orta mekteptiń dırektory:

Qyzmetkerler jeke kýáligin laqtyrdy maǵan ústeldiń ústine. Maǵan sóılegende "sen" dep sóıleıdi. Men ol adamdy túzettim. Men Abzal Amantaevıchpin dep. Eskertip aıttym. Mysqyldap óziniń tekserýshi ekendigin paıdalanyp, «Abzal Amantaevıch shyǵarsyń» deıdi. Bul jerde suraq týyndaıdy. Ákemniń kim ekendigine kúmán keltirip tur ma? Men solaı túsindim.

Búginde oblystyq komısıasy qaladaǵy barlyq úsh aýysymdy mektepterde tekserýdi bastaǵan. Sol shara aıasynda bul mektepte tekseris ótken jyly jeltoqsanda bastalyp, aqpan aıyna deıin aıaqtalýy tıis bolǵan. Biraq osy kúnge deıin tekserýdiń jalǵasýynyń sebebin komısıa bylaı dep túsindirdi.

Serik Orynbaev, Aqtóbe oblysy boıynsha tekserý komısıasynyń KMM múshesi:

Aýdıt tapsyrmasy boıynsha belgilengen adamdar qyzmettik jazba jazady. Kire almaı júrmiz tekseristi ári qaraı sozýǵa suraımyz dep sondyqtan biz uzartamyz. Al negizi bizde zańda barlyq merzim kórsetilmegen. Qaı ýaqytta qansha tekserý degen ony biz ózimiz zerdelep anyqtaımyz. Mysaly bul mektep qurylǵaly tekserilmegen. Mıllıardtaǵan aqsha. Buǵan 15-20 kún jetpeıdi.

Bul daýdan Memlekettik qyzmet isteri jónindegi agenttik ókilderi de habardar eken. Tekserýge kelgen memlekettik qyzmetkerlerdiń is-áreketine qatysty qyzmettik tekseris bastalǵanyn jetkizdi.

Meıramgúl Beıbitova, QR Memlekettik qyzmet isteri agenttigi Aqtóbe oblysy boıynsha departamenti basshysynyń orynbasary:

Biz osy búgin anyqtadyq. Tekserý komısıasynyń ádepsiz is-áreketterine baılanysty materıaldy ózderiniń jumys berýshisine memlekettik organǵa qyzmettik tergep tekserý úshin joldadyq. Onyń nátıjesi qyzmettik tekserýden keıin anyqtalady. Sosyn baǵa beriletin bolady.

Baqyt Rahmetova, tilshi:

Bul jaǵdaı boıynsha da tekserýshilerdiń kinási dáleldense tártiptik jaýapkershilikke tartylýy múmkin. Oraıy kelgende aıta keteıin, jalpy Aqtóbe oblysynda ótken jyly 733 memlekettik qyzmetkerge qatysty tártiptik shara qoldanylǵan.

https://youtu.be/z4eL4sjM8Ro