Uiymnyń janynan qurylǵan Mediatsiia institýtyna osy aida 6 jyl toldy dep habarlaidy Dalanews.kz.
Kópultty Qazaqstanda mediatorlar qaýymdastyǵyn qurý asa mańyzdy. Sol arqyly úlken daýǵa ulasýy múmkin urys-janjaldyń aldyn-alýǵa bolady.
Qyzyljar qalasynda ornalasqan "Mediatsiia ortalyǵynyń" jetekshisi Galina Pehotinanyń málim etkenindei búginderi Assambleia sapynda 2 myńǵa jýyq bilikti mediator bar. Sońǵy 5-6 jyldyń bederinde mediatorlardyń aldynda 120 myńnan asa azamat aryz aityp kelgen.
"Aryz-shaǵym ieleriniń máselesi sotqa jetpei, beibit túrde sheshildi. Turmystyq daý-damai ult arazdyq urys-keriske ulaspaýy úshin kóptegen azamattar kásibi mamandardyń kómegine júginedi. Assambleiaǵa qarasty Mediatsiia institýty da qarap jatqan joq. Sońǵy jyldary elimizdiń yrys-yntymaǵyn arttyra túsýge arqaý bolǵan 16 myńǵa jýyq mańyzdy is-shara uiymdastyrdyq. Bul bastama shamamen 300 myńǵa jýyq turǵyndy qamtydy", – deidi ol.
Pehotinanyń atap ótkenindei mediatorlar búgingi zamannyń bileri ispettes. Olar eki tarapty tatýlastyrýǵa tyrysyp, eki jaqtyń da kóńili tolaityn parasatty sheshim qabyldaýǵa tyrysady.
"Álbette, bul kelisimniń zańdyq kúshi bolýy kerek. Sol sebepti tatýlasqan taraptap "mediativti uiǵarym" dep atalatyn qujatqa qol qoiady, osylai ortaq mámilege keldi. Qatelespesem, qazirgi ýaqytta Assambleia qaraityn 20-ǵa jýyq Mediatsiia keńesi jumys isteidi. Assambleia basshylyǵy osynaý uiymdardyń ókilderimen únemi aqyldasyp, keńesip otyrady", – deidi maman.
Aita ketelik, Assambleia janyndaǵy Mediatsiia uiymdarymen elimizdegi Zańgerler alqasy, Adam quqy jónindegi ókildik, "Atameken" palatasy jáne basqa da mańyzdy qurylymdar áriptestik bailanys ornatqan.
Mediatsiia keńesinen bólek, Assambleia filialdarynda mediatsiia bólmeleri ashylǵanyn da aita ketýimiz kerek.
Budan buryn Dalanews.kz tilshisi Almaty qalasynda "Dostyq" úiinde ornalasqan 17 mediatsiia bólmesi týraly aqparat bergen bolatyn.
