"Maiqaiyńaltyndaǵy" apatty jaǵdai basqa ken oryndarynda qaitalanýy múmkin. Sebebi buǵan deiin jer qoinaýyndaǵy qazba bailyqty igerýdi ǵana bilgen investorlar rýdalardyń ornyn topyraqpen toltyrmai, tek betin jaýyp kete bergen, dep habarlaidy Dalanews.kz KTK arnasyna siltep.
"Rýdalardy alǵannan keiin, árine, bos oryndar qalady. Biraq ol bos oryndardy toltyrý kerek. Maiqaiyńda bos oryndy biteý degen uǵym bar. Sonymen toltyrý kerek bolǵan. Biraq ol jerde jobaǵa ózgeris engizip, toltyratynyn alyp tastaǵan. Sondyqtan bos oryn qaldy", - deidi TJM Ónerkásip qaýipsizdigi komiteti tóraǵasynyń orynbasary Musa Tanabaev.
Vedomstvony endigi mazalap otyrǵany — 30 jyldan beri kúndiz-túni qazylǵan ken oryndaryndaǵy apattyń aldyn alý. Ishi qýys qalǵan ken oryndary qazir jipke tizilýde. Al "Maiqaiyńaltyn" aýmaǵynda shuńqyrǵa qulaǵan eki adamnyń máiitin izdestirý 30 naýryzda jalǵasýy múmkin.
Taý jynysynyń qulaý qaýpin endi saraptama qorytyndysy kórsetýge tiis. Ázirge alǵashqy skanerleý nátijesi qulaǵan avtobýstyń taǵy da jeti metr tereńdikke syrǵyǵanyn anyqtaǵan. Qutqarý jumystaryna sheteldik mamandardyń tartylmaitynyn tótenshe jaǵdailar ministrigi búgin ashyp aitty.
"Negizgi jumys ekskavator shuńqyr qazady. Mashinaǵa tiep shyǵarady. Bul jerde qandai shet elden kúsh kerek? Qarapaiym jumys qana", - deidi Tanabaev.
