№ 48386 áskeri bólimshe bastyǵynyń orynbasary Rústem Janyqbaevtyń denesi ótken jyldyń jeltoqsanynda úiiniń aýlasynan tabylǵan bolatyn.
Týra 40 kún buryn maior Rústem Janyqbaevty Qaratal yqshamaýdanyndaǵy ózi turatyn kópqabatty úidiń aldynda atyp ketken.
Jaralanǵan áskeri qyzmetker dárigerler jetkenshe jan tapsyrǵan-dy. Sodan beri jedel izdestirý tergeý toby maiordy mert qylǵan adamnyń izine tústi. Al qaskói alystan kelmegen boldy.
Ańshy myltyǵynan oq atqan 38 jastaǵy er azamat №48/386 áskeri bólimshesiniń qyzmetkeri. Iaǵni, marqumnyń áriptesi. Qylmysyn da birden moiyndaǵan. Ol qylmysqa barǵanyna ókinetinin, qolyn qanǵa malýyna marqum Janyqbaevtan kórgen álimjettikten keiin barǵanyn aitypty. 36 jastaǵy bastyǵynyń toqpaǵyna shydamaǵan ol qarý kezenipti.
– Maior Janyqbaev jumysta óziniń qyzmetin paidalanyp uryp, únemi soǵatyn. Soǵan shydai almai qylmys jasadym, – dedi áriptesine oq atyqan áskeri adam.
Áýel basta marqumnyń týystary da bul qastandyqty Rústemniń qyzmetimen bailanystarǵan. Boljam dóp keldi.
– Atalǵan fakti boiynsha QR Qylmystyq kodekstiń 99-babyna sáikes qylmystyq is qozǵalyp, jedel izdestirý sharalary bastaldy. Nátijesinde kúdikti anyqtalyp, quryqtaldy. Búgingi tańda istiń mán-jaiy anyqtalyp jatyr. Ázirge kúdikti ýaqytsha ustaý izoliatorynda, – dedi Taldyqorǵan qalalyq PB bastyǵynyń orynbasary Baýyrjan Tilekbaev.
Al, kisi qolynan qaza tapqan maiordyń artynda eki balasy qaldy. Áskeriler qyzmet etken áskeri bólimshe osy ýaqytqa deiin bolǵan jaitqa qatysty qandai da bir pikir bildirýge qulyqsyz.
Ásem QABYLBEK
