Qazaqstan Respýblikasynyń Mádeniet jáne aqparat ministrligi 2003 jylǵy IýNESKO Konventsiiasy aiasynda jergilikti qaýymdastyqtardyń materialdyq emes mádeni murasyn (MEMM) qorǵaý boiynsha aýqymdy jobalardy iske asyrýda, – dep habarlaidy Dalanews.kz.
Bul – Qazaqstannyń ulttyq biregeiliginiń mańyzdy bóligi sanalatyn mádeni dástúrler men tájiribelerdi odan ári saqtaý úshin strategiialyq turǵyda qajet joba.
Osy bastama aiasynda ministrlik IýNESKO-nyń tehnikalyq grantyn iske asyrý úshin Atyraý, Shyǵys Qazaqstan, Qaraǵandy, Qyzylorda jáne Jetisý oblystarynyń ákimdikterimen yntymaqtastyq týraly memorandýmdarǵa qol qoidy. Bul áriptestik aimaqtyq deńgeide materialdyq emes mádeni murany júieli túrde saqtaý men damytý úshin mańyzdy.
Jobanyń negizgi mindetteri – materialdyq emes mádeni mura elementterin qorǵaý, damytý jáne jan-jaqty nasihattaýǵa arnalǵan tiimdi óńirlik mehanizmder qurý. Sondai-aq oblystyq jáne aýdandyq deńgeidegi mamandar, joǵary oqý oryndarynyń oqytýshylary men jergilikti qaýymdastyq ókilderi úshin oqytý seminarlary men treningter ótkizý josparlanǵan. Oqý barysynda MEMM elementterin túgendeý men qujattaýdyń ádisterin meńgerý, sondai-aq dástúrler men mádenietti ustanatyn azamattarmen bailanys ornatý máselelerine nazar aýdarylady.
Budan bólek, materialdyq emes mádeni mura jónindegi aqparattyq-anyqtamalyq materialdardy daiyndaýda konsýltativtik qoldaý kórsetý, jergilikti MEMM elementterin Ulttyq tizimge engizý boiynsha kómek kórsetý jáne barlyq talaptar oryndalǵan jaǵdaida olardy IýNESKO tizimine qosý sharalary qarastyrylǵan. Bul Qazaqstannyń mádeni dástúrlerin halyqaralyq deńgeide qorǵaý ári moiyndaý múmkindikterin arttyrady.
Jalpy, jobany júzege asyrý bul saladaǵy mamandardyń biliktiligin arttyryp qana qoimai, materialdyq emes mádeni murany bolashaq urpaqqa saqtap, jetkizýdiń tiimdi júiesin qurýǵa jaǵdai jasaidy.
Osy baǵyttaǵy jumystar tek Qazaqstan mádenietindegi elementterdi saqtaýǵa ǵana emes, sonymen qatar áleýmettik birlikti nyǵaitýǵa, mádenietpen tolyq tanysýǵa jáne jergilikti qaýymdastyqtardyń turaqty damýyna yqpal etedi.
