Búgin Almatyda ótken baspasóz jiynynda Seiitqazy Mataevty qorǵaý komitetiniń músheleri Qazaqstannyń sybailas jemqorlyqqa qarsy biýrosynyń Qazaqstan jýrnalister Odaǵynyń tóraǵasy, Ulttyq baspasóz klýbynyń jetekshisi Mataevtyń isin tergeý barysynda zańdy belden basyp otyrǵandaryn málimdedi.
Komitet quramyna "Ádil Sóz" halyqaralyq qorynyń jetekshisi Tamara Kaleeva, "Adam quqyqtarynyń Hartiiasy" qorynyń atqarýshy redaktory Jemis Turmaǵambetova, "Aq Jaiyq" media-holdinginiń tóraǵasy Ábdildá Muqashev, Mataevtyń advokattary - Andrei Petrov pen Mádina Bakievalar kiredi. Komitet ókilderi tergeýshilerdiń jaýap alýǵa shaqyrǵan BAQ redaktorlarynan eshteńeni jariia etpeýdi talap etýlerin jáne Seiitqazy Mataevtyń otbasy múshelerin tergeýge árekettengenderin zań buzýshylyq dep sanaidy.
Mataevtyń advokattary «qylmystyq is materialdaryn baspasóz betinde jariia qylǵany úshin» sybailas jemqorlyqqa qarsy Ulttyq biýro tóraǵasynyń orynbasary Talǵat Tatýbaevty jaýapqa tartýdy surap prokýratýraǵa shaǵymdanǵan.
Advokattar 13 naýryzda qylmystyq isti tergeý merziminiń aiaqtalǵanyn, jáne qorǵaýshylar tarabyna isti tergeýdi sozý týraly eshqandai qujattyń berilmegenin aitty. Qorǵaýshylardyń dereginshe, ótken senbide tergeýshiler qan qysymynyń joǵarylap, jaǵdaiynyń nasharlaǵanyn aitqan Mataevty tergeýge tyrysqan.
Komitet sonymen birge býndestagtyń burynǵy depýtaty Viola fon Kramonnyń Seiitqazy Mataevqa qatysty qylmystyq is toqtatylmasa eýropalyq delegatsiianyń Astanada ótetin EXPO-2017 kórmesine barmaýy múmkin ekeni týraly málimdemesimen tanystyrdy. fon Kramon Deutche Welle arnasyna bergen suhbatynda osylai degen. Sonymen birge 10 naýryzda Eýroparlamenttiń 156 depýtaty men 7 fraktsiiasy qol qoiǵan Qazaqstandaǵy sóz bostandyǵy týraly qararyn da eske saldy. Eýroparlament Qazaqstan biligin jýrnalisterdi qýdalaýdy toqtatýǵa, onyń ishinde Seiitqazy Mataevtyń isi boiynsha zańsyzdyqtardy tyiýǵa shaqyrdy. Mataevty bilik oryndary memleket qarjysyn qymqyrdy jáne salyq tóleýden jaltardy dep aiyptaýda. 24 aqpannan beri ol úi qamaýynda otyr.
