بۇگىن الماتىدا وتكەن باسپا ءسوز جيىنىندا سەيىتقازى ماتايەۆتى قورعاۋ كوميتەتىنىڭ مۇشەلەرى قازاقستاننىڭ سىبايلاس جەمقورلىققا قارسى بيۋروسىنىڭ قازاقستان جۋرناليستەر وداعىنىڭ ءتوراعاسى، ۇلتتىق باسپا ءسوز كلۋبىنىڭ جەتەكشىسى ماتايەۆتىڭ ءىسىن تەرگەۋ بارىسىندا زاڭدى بەلدەن باسىپ وتىرعاندارىن مالىمدەدى.
كوميتەت قۇرامىنا "ءادىل ءسوز" حالىقارالىق قورىنىڭ جەتەكشىسى تامارا كالەيەۆا، "ادام قۇقىقتارىنىڭ حارتياسى" قورىنىڭ اتقارۋشى رەداكتورى جەمىس تۇرماعامبەتوۆا، "اق جايىق" مەديا-حولدينگىنىڭ ءتوراعاسى ءابدىلدا مۇقاشيەۆ، ماتايەۆتىڭ ادۆوكاتتارى - اندرەي پەتروۆ پەن ءمادينا باكييەۆالار كىرەدى. كوميتەت وكىلدەرى تەرگەۋشىلەردىڭ جاۋاپ الۋعا شاقىرعان ب ا ق رەداكتورلارىنان ەشتەڭەنى جاريا ەتپەۋدى تالاپ ەتۋلەرىن جانە سەيىتقازى ماتايەۆتىڭ وتباسى مۇشەلەرىن تەرگەۋگە ارەكەتتەنگەندەرىن زاڭ بۇزۋشىلىق دەپ سانايدى.
ماتايەۆتىڭ ادۆوكاتتارى «قىلمىستىق ءىس ماتەريالدارىن باسپا ءسوز بەتىندە جاريا قىلعانى ءۇشىن» سىبايلاس جەمقورلىققا قارسى ۇلتتىق بيۋرو ءتوراعاسىنىڭ ورىنباسارى تالعات تاتۋبايەۆتى جاۋاپقا تارتۋدى سۇراپ پروكۋراتۋراعا شاعىمدانعان.
ادۆوكاتتار 13 ناۋرىزدا قىلمىستىق ءىستى تەرگەۋ مەرزىمىنىڭ اياقتالعانىن، جانە قورعاۋشىلار تارابىنا ءىستى تەرگەۋدى سوزۋ تۋرالى ەشقانداي قۇجاتتىڭ بەرىلمەگەنىن ايتتى. قورعاۋشىلاردىڭ دەرەگىنشە، وتكەن سەنبىدە تەرگەۋشىلەر قان قىسىمىنىڭ جوعارىلاپ، جاعدايىنىڭ ناشارلاعانىن ايتقان ماتايەۆتى تەرگەۋگە تىرىسقان.
كوميتەت سونىمەن بىرگە بۋندەستاگتىڭ بۇرىنعى دەپۋتاتى ۆيولا فون كراموننىڭ سەيىتقازى ماتايەۆقا قاتىستى قىلمىستىق ءىس توقتاتىلماسا ەۋروپالىق دەلەگاسيانىڭ استانادا وتەتىن EXPO-2017 كورمەسىنە بارماۋى مۇمكىن ەكەنى تۋرالى مالىمدەمەسىمەن تانىستىردى. فون كرامون Deutche Welle ارناسىنا بەرگەن سۇحباتىندا وسىلاي دەگەن. سونىمەن بىرگە 10 ناۋرىزدا ەۋروپارلامەنتتىڭ 156 دەپۋتاتى مەن 7 فراكسياسى قول قويعان قازاقستانداعى ءسوز بوستاندىعى تۋرالى قارارىن دا ەسكە سالدى. ەۋروپارلامەنت قازاقستان بيلىگىن جۋرناليستەردى قۋدالاۋدى توقتاتۋعا، ونىڭ ىشىندە سەيىتقازى ماتايەۆتىڭ ءىسى بويىنشا زاڭسىزدىقتاردى تىيۋعا شاقىردى. ماتايەۆتى بيلىك ورىندارى مەملەكەت قارجىسىن قىمقىردى جانە سالىق تولەۋدەن جالتاردى دەپ ايىپتاۋدا. 24 اقپاننان بەرى ول ءۇي قاماۋىندا وتىر.
